निवडणुका घेण्यास यंत्रणा सक्षम

निवडणुका घेण्याकरिता निवडणूक यंत्रणा सक्षम आणि सज्ज असल्याची माहिती राज्य निवडणूक आयुक्त ज. स.सहारिया यांनी गुरुवारी

अलिबाग : निवडणुका घेण्याकरिता निवडणूक यंत्रणा सक्षम आणि सज्ज असल्याची माहिती राज्य निवडणूक आयुक्त ज. स.सहारिया यांनी गुरुवारी संध्याकाळी येथील जिल्हाधिकारी कार्यालयाच्या सभागृहात आयोजित पत्रकार परिषदेत बोलताना दिली आहे. कोकणातील पालघर, रायगड,रत्नागिरी आणि सिंधुदुर्ग या चार जिल्ह्यांतील नगरपरिषद व नगरपंचायतींच्या निवडणुकांच्या संदर्भातील विभागीय आढावा बैठक त्यांनी येथे घेतली, त्यानंतर ते पत्रकारांशी बोलत होते. कोकणातील या चार जिल्ह्यात सर्वाधिक नऊ नगरपरिषदांच्या निवडणुका रायगड जिल्ह्यात असल्याने आढावा बैठक येथे घेतल्याचे त्यांनी सांगितले.कोकणातील एकू ण ७४ उमेदवार थेट नगराध्यक्षपदाचे आहेत तर ३९६ नगरसेवक पदाकरिता एकू ण १२१६ उमेदवार रिंगणात आहेत. पालघरमध्ये तीन, रायगडमध्ये नऊ, रत्नागिरीमध्ये पाच तर सिंधुदुर्ग जिल्ह्यात चार अशा २१ नगरपरिषदांची निवडणूक होत आहे. या सर्व नगरपरिषदांमध्ये रायगडमध्ये सर्वाधिक ८१ प्रभाग आणि सर्वाधिक २५७ मतदान केंद्रे असून एकूण १ लाख ८५ हजार १७० मतदार आहेत. पालघरमध्ये ३ नगरपरिषदांमध्ये ५१ प्रभाग, ५१ मतदान केंद्रे व ९ हजार ४३० मतदार आहेत. रत्नागिरीमध्ये ५ नगरपरिषदांमध्ये ६१ प्रभाग, १५६ मतदान केंद्रे आणि १ लाख १७ हजार २५० मतदार आहेत. तर सिंधुदुर्ग जिल्ह्यात ४ न.पा.मध्ये ४१ प्रभाग, ७४ मतदान केंद्रे आणि ५२ हजार ०६६ मतदार असल्याचे त्यांनी सांगितले. नगरपरिषद व नगरपंचायतीच्या निवडणुकांमध्ये आचारसंहितेची प्रभावी अंमलबजावणी करावी, तसेच मतदानाचे प्रमाण वाढण्यासाठी व्यापक प्रमाणात मतदार जागृती मोहीम हाती घ्यावी अशा सूचना दिल्याचे त्यांनी सांगितले.राज्य निवडणूक आयोगाने राज्यातील एकू ण १९२ नगरपरिषदा व २० ग्रामपंचायतींच्या सार्वत्रिक निवडणुकांचा आणि थेट नगराध्यक्षपदाच्या निवडणुकीचा कार्यक्रम जाहीर केला आहे. पहिल्या टप्प्यातील २५ जिल्ह्यांमधील १४७ नगरपरिषदा व १८ नगरपंचायतींसाठी २७ नोव्हेंबर २०१६ रोजी मतदान होत आहे. दुसऱ्या टप्प्यात पुणे, लातूर या दोन जिल्ह्यातील १४ नगरपरिषदांसाठी १४ डिसेंबर २०१६ रोजी मतदान होत आहे. तिसऱ्या टप्प्यात औरंगाबाद, नांदेड, भंडारा आणि गडचिरोली या चार जिल्ह्यातील २० नगरपरिषदा व २ नगरपंचायतीसाठी १८ डिसेंबर २०१६ रोजी मतदान होत आहे.तर शेवटच्या टप्प्यात नागपूर आणि गोंदिया या दोन जिल्ह्यातील ११ नगरपरिषदांसाठी ८ जानेवारी २०१७ रोजी मतदान होत असल्याचेही राज्य निवडणूक आयुक्त ज. स.सहारिया यांनी सांगितले. यावेळी आयोगाचे सचिव शेखर चन्ने, रायगडच्या जिल्हाधिकारी शीतल तेली-उगले, जिल्हा पोलीस अधीक्षक सुवेझ हक आदि उपस्थित होते. (विशेष प्रतिनिधी)