पुणे - भरधाव कारवरील नियंत्रण सुटल्याने ती मेट्रोच्या खांबाला जाऊन धडकली. या अपघातात कारमधील तीन तरुणांचा मृत्यू झाला. ही घटना रविवारी पहाटे पाचच्या सुमारास बंडगार्डन मेट्रो स्टेशनखाली घडली. मृतांमध्ये दोन चुलत भावांचा समावेश आहे. कारमध्ये बिअरची बाटली सापडल्याने हा ड्रंक अँड ड्राईव्हचा प्रकार असल्याचा प्राथमिक अंदाज पोलिसांनी वर्तवला आहे. या भीषण अपघातामध्ये कारचा (एमएच १४ डी टी ८२९२) चुराडा झाला. या घटनेमुळे पुणेकरांना पोर्शे कार अपघाताची आठवण झाली. अपघाताची संपूर्ण घटना सीसीटीव्ही कॅमेऱ्यांमध्ये कैद झाली असून, अपघाताचा थरारक व्हिडीओ सोशल मीडियावर देखील व्हायरल झाला आहे.
यश प्रसाद भंडारी (२३, रा.थेरगाव, पिंपरी चिंचवड), ऋत्विक उर्फ ओम विनायक भंडारी (२३, रा. पिंपरी गाव) आणि खुशवंत किशोर टेकवाणी (१९, रा. बीड) अशी मृतांची नावे आहेत. यश आणि ऋत्विक चुलत भाऊ आहेत. ऋत्विकने एमबीए फायनान्सचे शिक्षण घेतले असून तो एका खासगी कंपनीत काम करतो, तर यश आयटी कंपनीत नोकरीला होता. खुशवंत हा कोथरूड परिसरातील नामांकित अभियांत्रिकी महाविद्यालयात बी.टेक.चे शिक्षण घेत होता. यश आणि ऋत्विक यांच्यासोबत खुशवंतची मैत्री नेमकी कशी झाली याबाबत पोलिस तपास करत आहेत. याप्रकरणी कोरेगाव पार्क पोलिस ठाण्यात अपघाताचा गुन्हा दाखल करण्यात आला आहे.
पोलिसांनी दिलेल्या माहितीनुसार, रविवारी (दि. २) पहाटे पावणे पाचच्या सुमारास नियंत्रण कक्षाला कॉल आला. घटनास्थळी बंडगार्डन आणि कोरेगाव पार्क पोलिस ठाण्याचे मार्शल पोहोचले. तेव्हा बंडगार्डन मेट्रो स्टेशनखाली असलेल्या ८ नंबरच्या खांब्याच्या बाजूला असलेल्या खांबाला धडकून एका पोलो कारचा चुराडा झालेला आढळला. पुढील सीटवरील दोघेही मृतावस्थेत आढळले. मागील सीटवरील खुशवंतची हालचाल सुरु होती. त्याला तातडीने ससून रुग्णालयात दाखल करण्यात आले. तेथे उपचारादरम्यान त्याचा मृत्यू झाला. परिसरातील मेट्रोच्या सीसीटीव्हीची पहाणी केली असतो पोलो कार रुबी हॉल क्लिनिकडून बंडगार्डनच्या दिशेने भरधाव वेगाने येऊन बंडगार्डन मेट्रो स्टेशनच्या खांब्याला आदळलेली दिसते. गाडी पोलला धडकल्यानंतर उलटी फिरली होती. घटनास्थळी फॉरेन्सिक पथक देखील दाखल झाले होते. गाडीचा वेग १२० ते १६० च्या जवळपास असल्याची शक्यता वर्तवली जात आहे. यश आईवडिलांचा एकुलता एक मुलगा आहे तर ऋत्विकला एक बहिण आहे. त्यांच्या कुटुंबाला या घटनेने मोठा हादरा बसला आहे. दरम्यान खुशवंतचे वडील रविवारी दुपारनंतर बीडवरून पुण्यात दाखल झाले होते.
--
आईला सांगितले पार्टीला जातोय...यश याने आईला रात्री दहाच्या सुमारास पार्टीला जातोय असे सांगितले होते. मात्र, त्याच्या वडिलांना याची कल्पना नव्हती. जाताना त्याने सोबत ऋत्विकला घेतले. तर खुशंवतला कुठून पिकअप केले गेले हे माहीत पडले नाही. त्यांनी पार्टी कुठे केली, तेथे मद्यपान केले का? तसेच ते बंडगार्डनच्या दिशेने कुठे निघाले होते याचा तपास केला जात असल्याची माहिती पोलिस निरीक्षक संगीता जाधव यांनी दिली.
तरुणांच्या जीवावर बेततेय पार्टी कल्चर...
पोर्शेे कार अपघातानंतर पब आणि पार्टी कल्चर विषय चर्चेला आला. शहरात सातत्याने मद्यधुंद अवस्थेत मध्यरात्री व पहाटे अनेक अपघात घडत आहेत. यामुळे पब आणि रेस्टॉरंट बारवर मध्यंतरी कारवाईचा बडगा उघडला गेला होता, यानंतरही अशा घटना घडत आहेत. रविवारी मध्यरात्री १२ नंतर ड्राय डे लागल्याने हे तीन तरुण पहाटे पाच वाजेपर्यंत कुठे-कुठे फिरत होते याचा तपास पोलिस करत आहेत.
Web Summary : A high-speed car crash in Pune's Koregaon Park killed two young men instantly. The car hit a metro pillar near Bundgarden. Police are investigating the accident, suspected to be caused by speeding and loss of control. Traffic was disrupted.
Web Summary : पुणे के कोरेगांव पार्क में तेज रफ्तार कार दुर्घटना में दो युवकों की तत्काल मौत हो गई। कार बंडगार्डन के पास मेट्रो पिलर से टकरा गई। पुलिस दुर्घटना की जांच कर रही है, आशंका है कि यह गति और नियंत्रण खोने के कारण हुई। यातायात बाधित हुआ।