नागरिकांकडून पाण्याचे पैसे मागितल्यास ५ हजार रुपयांची दंडात्मक कारवाई; पुणे महापालिकेचा टँकर चालकांना इशारा

नागरिकांकडे टँकरचालकांनी पैसे मागितल्यास पाणीपुरवठा विभागाकडे ९६८९९००००२ या व्हॉट्सॲप क्रमांकावर पुराव्यांसह फोटो पाठवावा, असे आवाहन जगताप यांनी केले आहे

पुणे : महापालिकेच्या वतीने टँकरद्वारे केल्या जाणाऱ्या पाणीपुरवठ्यासाठी टँकर चालकाने किंवा मालकाने नागरिकांकडून पैसे घेतल्यास किंवा पैशांची मागणी केल्यास संबंधितांवर ५ हजार रुपये दंडाची कारवाई केली जाईल, असा इशारा महापालिकेच्या पाणी पुरवठा विभागाचे प्रमुख नंदकिशोर जगताप यांनी दिला आहे.

महापालिकेच्या वतीने शहराच्या काही भागांमध्ये टँकरने पाणीपुरवठा करण्यात येतो. उन्हाळ्यात पाण्याची मागणी वाढते. मात्र, टँकरचालक, मालक संधीचा फायदा घेत नागरिकांकडे पाण्याच्या टँकरसाठी पैशांची मागणी करतात. काही नागरिक गरजेपोटी पैसेही देतात. मात्र, अनेक ठिकाणी यामधून वाददेखील होतात. यासंदर्भात महापालिकेच्या पाणीपुरवठा विभागाकडे तक्रारी आल्या आहेत. नागरिकांकडून आलेल्या तक्रारीनंतर महापालिकेचा पाणीपुरवठा विभाग सजग झाला आहे. पाणीपुरवठा विभागाचे मुख्य अभियंता नंदकुमार जगताप यांनी टँकरचालक अथवा मालकांनी पैशाची मागणी करू नये. नागरिकांनीही त्यांच्या मागणीस भरीस पडू नये, असे आवाहन केले आहे. नागरिकांकडे टँकरचालक अथवा मालकांनी पैसे मागितल्यास पाणीपुरवठा विभागाकडे ९६८९९००००२ या व्हॉट्सॲप क्रमांकावर पुराव्यांसह फोटो पाठवावा, असे आवाहन जगताप यांनी केले आहे.

महापालिकेच्या वतीने दिले जाणारे टँकर हे मोफत असतात. त्यासाठी महापालिका कोणतेही शुल्क घेत नाही. टँकरचालकांनी नागरिकांकडून शुल्क घेऊ नये. जे टँकरचालक, मालक पाण्याच्या टँकरसाठी नागरिकांकडून बेकायदा पद्धतीने पैसे घेतील, त्यांच्यावर पाच हजार रुपयांच्या दंडाची कारवाई केली जाईल. - नंदकुमार जगताप, पाणीपुरवठा विभाग प्रमुख, पुणे महापालिका