पुणे : इमारतीच्या गॅलरीच्या ग्रिलवर चढून पेंटींगचे काम करत असताना तोल जाऊन खाली पडल्याने एका पेंटरचा मृत्यू झाल्याची घटना कोथरूड परिसरात घडली आहे. कामगारांच्या सुरक्षेत हलगर्जीपणा केल्याप्रकरणी कोथरूडपोलिसांनी ठेकेदारावर गुन्हा दाखल केला आहे. जगतमुरत गुलाब निषाद (वय ३०, रा. केळेवाडी, कोथरुड, मूळ-उत्तर प्रदेश ) असे पेंटींग करताना खाली पडून मृत्यू झालेल्या पेंटरचे नाव आहे. तर अनिकेत ज्ञानेश्वर गढई (वय २५, रा. कर्वे रोड) आणि यशवंत प्रभाकर देशपांडे (वय ५३, रा. कर्वेनगर ) अशी गुन्हा दाखल झालेल्यांची नावे आहेत.
पोलिसांनी दिलेल्या माहितीनुसार, कोथरुड परिसरातील रामबाग कॉलनी उमा महेश को-ऑपरेटिव्ह हौसिंग सोसायटीत इमारतीच्या पेंटींगचे काम सुरू होते. त्याठिकाणी जगतमुरत २० एप्रिल रोजी गॅलरीच्या ग्रिलवर उभा राहून पेंटींग काम करत होता. त्यावेळी त्याचा तोल जाऊन तो खाली पडला. त्याला उपचारासाठी रुग्णालयात दाखल करण्यात आले होते. मात्र, उपचारादरम्यान त्याचा मृत्यू झाला. दरम्यान, अनिकेत गढई व यशवंत देशपांडे इमारतीचे पेंटींगचे काम घेणारे ठेकेदार आहेत. त्यांनी कामाच्या ठिकाणी कामगारांच्या सुरक्षेची कोणतीही साधने न पुरवता हलगर्जीपणा केल्याचे निदर्शनास आल्याने त्यांच्यावर गुन्हा दाखल करण्यात आला आहे. या प्रकरणाचा अधिक तपास सहायक पोलिस उपनिरीक्षक आर. आर. आडगळे करीत आहेत.