पुण्यातील महादेववाडी-उंड्री परिसरात पिण्याच्या पाण्यात अळ्या; नागरिकांमध्ये तीव्र संतापाचे वातावरण

पुढील दोन दिवसांत ठोस कार्यवाही न झाल्यास पुणे महापालिका आयुक्तांच्या दालनात तीव्र स्वरूपाचे आंदोलन छेडण्यात येईल, असा नागरिकांचा इशारा

हडपसर : पुणे महापालिकेच्या प्रभाग क्रमांक ४१ अंतर्गत येणाऱ्या महादेववाडी-उंड्री परिसरातील घुलेनगरमध्ये नागरिकांना पिण्याच्या पाण्यात मोठ्या प्रमाणावर अळ्या आढळून आल्याचे समोर आले. पिण्याच्या पाण्यासारख्या अत्यावश्यक सेवेत झालेल्या या गंभीर त्रुटीमुळे आरोग्यावर थेट परिणाम होण्याची शक्यता निर्माण झाली आहे. परिसरात तीव्र चिंता व संतापाचे वातावरण आहे.

तसेच सर्व्हे क्रमांक १२ परिसरात मलनिस्सारण वाहिनीमधील सांडपाणी काही घरांमध्ये शिरत असल्याच्या तक्रारी प्राप्त झाल्या आहेत. या परिस्थितीमुळे लहान मुले, ज्येष्ठ नागरिक व महिला यांच्या आरोग्यास संसर्गजन्य आजारांचा धोका संभवत आहे. संबंधित विभागाकडून वेळेवर देखभाल व दुरुस्ती न झाल्यामुळे ही परिस्थिती उद्भवल्याचा आरोप स्थानिक नागरिकांकडून करण्यात येत आहे. या संदर्भात शिंदेसेनेचे शहर प्रमुख प्रमोद भानगिरे यांच्या नेतृत्वाखाली पुणे महापालिका आयुक्त नवल किशोर राम यांना निवेदन देण्यात आले. त्यामध्ये महादेववाडी परिसरात तातडीने स्वच्छ व निर्जंतुक पिण्याच्या पाण्याचा पर्यायी पुरवठा सुरू करणे, विद्यमान पाणीपुरवठा वाहिन्यांची तांत्रिक तपासणी करून आवश्यक दुरुस्ती करणे तसेच ड्रेनेज व्यवस्थेतील बिघाडावर त्वरित कायमस्वरूपी उपाययोजना करणे, अशा मागण्या करण्यात आल्या आहेत. या प्रकरणी पुढील दोन दिवसांत ठोस कार्यवाही न झाल्यास पुणे महापालिका आयुक्तांच्या दालनात तीव्र स्वरूपाचे आंदोलन छेडण्यात येईल, असा इशारा देण्यात आला आहे.

गेल्या काही दिवसांपासून पाणी गढूळ येत असल्याची तक्रार आम्ही करत होतो. प्रत्यक्ष पाण्यात अळ्या दिसल्यावर धक्का बसला. हेच पाणी पिण्यासाठी, स्वयंपाकासाठी वापरले जाते. लहान मुलांचे आणि ज्येष्ठांचे आरोग्य धोक्यात आले आहे. महापालिकेने तातडीने स्वच्छ पाण्याची व्यवस्था करावी. - संगीता नलावडे, स्थानिक रहिवासी

वारंवार तक्रारी करूनही प्रशासनाकडून दखल घेतली जात नाही. आजारी पडल्यावर जबाबदारी कोण घेणार ? जर लवकर उपाययोजना झाल्या नाही, तर आम्ही देखील आंदोलनात सहभागी होणार आहोत. - आनंद माने, स्थानिक रहिवासी