पंतप्रधान नरेंद्र मोदी यांना स्वीडनचा सर्वोच्च सन्मान प्रदान; ठरला ३१वा जागतिक पुरस्कार!

PM modi receives sweden highest honor: जवळपास आठ वर्षांनंतर त्यांचे स्वीडनमध्ये जोरदार स्वागत झाले

PM modi receives sweden highest honor: पंतप्रधान नरेंद्र मोदी सध्या चार देशांच्या युरोप दौऱ्यावर आहेत. त्यांच्या दौऱ्याच्या दुसऱ्या टप्प्यासाठी ते रविवारी स्वीडनमधील गोटेबर्ग येथे दाखल झाले. त्यांचे मोठ्या उत्साहात स्वागत करण्यात आले. स्वीडनने त्यांना 'रॉयल ऑर्डर ऑफ पोलर स्टार' (Royal Order Of Polar Star) हा सर्वोच्च सन्मान प्रदान केला. दोन्ही देशांमध्ये अनेक महत्त्वाच्या विषयांवर चर्चा झाली. ते १७ आणि १८ मे असे दोन दिवस स्वीडनमध्ये असतील. यापूर्वी २०१८ मध्ये, जेव्हा पहिली भारत-नॉर्डिक शिखर परिषद तेथे आयोजित करण्यात आली होती, तेव्हा मोदींनी स्वीडनला भेट दिली होती. त्यानंतर जवळपास आठ वर्षांनंतर त्यांचे स्वीडनमध्ये स्वागत झाले.

लढाऊ विमानांनी मोदींच्या विमानाला दिली सुरक्षा, मग उतरले...

पंतप्रधान मोदींचे विमान स्वीडिश हवाई क्षेत्रात दाखल होताच, स्वीडिश हवाई दलाच्या ग्रिपेन लढाऊ विमानांनी त्यांच्या विमानाला संरक्षण दिले. या विमानांनी पंतप्रधान मोदींच्या विमानाला सुरक्षा कवच पुरवत गोटेबर्ग विमानतळापर्यंत सोबत केली. हा एक मोठा सन्मान आहे. एखाद्या राष्ट्रप्रमुखाला अशाप्रकारे सोबत करणे, किंवा त्यांच्या विमानासोबत लढाऊ विमाने पाठवणे, यातून यजमान देश त्या नेत्याला किती महत्त्व देतो हे दिसून येते.

स्वीडनच्या पंतप्रधान स्वत: विमानतळावर

स्वीडनचे पंतप्रधान उल्फ क्रिस्टरसन यांनी गोटेबर्ग विमानतळावर मोदींचे वैयक्तिकरित्या स्वागत केले. हा एक विशेष प्रसंग आहे, कारण सहसा एखाद्या देशाचे पंतप्रधान विमानतळावर पाहुण्या नेत्याचे स्वागत करत नाहीत. त्यामुळे स्वीडनने पंतप्रधान मोदींचा विशेष सन्मान केल्याचे दिसून आले.

Jag är tacksam för statsminister Kristerssons fina gest att ta emot mig på Göteborgs flygplats. Ser fram emot att stärka vänskapen mellan Indien och Sverige under detta viktiga besök.@SwedishPMpic.twitter.com/lvRrKjo5NN

— Narendra Modi (@narendramodi) May 17, 2026

स्वीडनच्या सर्वोच्च शासकीय पुरस्काराने सन्मान

स्वीडनने पंतप्रधान मोदींना आपला सर्वोच्च शासकीय सन्मान - 'रॉयल ​​ऑर्डर ऑफ द पोलर स्टार, कमांडर ग्रँड क्रॉस' प्रदान केला, जो त्यांच्या सर्वोच्च सन्मानांपैकी एक आहे. हा सन्मान कोणत्याही प्रमुखाला दिला जाणारा सर्वोच्च सन्मान मानला जातो. भारत आणि स्वीडन यांच्यातील संबंध दृढ केल्याबद्दल, जागतिक सहकार्य वाढवल्याबद्दल आणि विविध क्षेत्रांतील भागीदारी पुढे नेल्याबद्दल पंतप्रधान मोदींना हा सन्मान देण्यात आला. पंतप्रधान मोदींना मिळालेला हा ३१वा आंतरराष्ट्रीय सन्मान आहे.

A reaffirmation of friendship!

Her Royal Highness Crown Princess Victoria of Sweden conferred upon PM @narendramodi the ‘Royal Order of the Polar Star, Degree Commander Grand Cross’ in recognition of his exceptional contribution to the 🇮🇳-🇸🇪 relationship and his visionary… pic.twitter.com/PwyK2YIiaF

— Randhir Jaiswal (@MEAIndia) May 17, 2026

भारतीय समुदायाने केले मोदींचे स्वागत, बंगाली संस्कृतीची दिसली झलक

विमानतळावर उतरल्यानंतर मोदींनी स्वीडनमध्ये राहणाऱ्या भारतीय समुदायाच्या सदस्यांची भेट घेतली. या सोहळ्यात अनेक कार्यक्रम सादर झाले. स्वीडिश ऑपेरा गायिका शार्लोटा हल्ड यांनी 'वैष्णव जन तो' गायले. भरतनाट्यम नृत्याचा कार्यक्रमही सादर करण्यात आला. बंगाली संस्कृतीची एक अद्भुत झलकही पाहायला मिळाली.

Bengali culture is popular world over and Sweden is no exception.

During the community welcome, in which PM Kristersson was also present, a glimpse of the glorious Bengali culture was on display. pic.twitter.com/m28kYPICoM

— Narendra Modi (@narendramodi) May 17, 2026

या कार्यक्रमाला स्वीडनचे पंतप्रधान क्रिस्टरसनही उपस्थित होते. मोदींनी स्वतः सोशल मीडियावर लिहिले की, बंगाली संस्कृती जगभर प्रसिद्ध आहे आणि स्वीडनही त्याला अपवाद नाही.