--
जेजुरी : हॅलो सर, हाऊ आर यू.. अशी आपुलकीची साद घालीत पुरंदर तालुक्यातील इयत्ता पहिली ते नववीच्या शाळा आज ऑनलाइन पद्धतीने मोठ्या उत्साहात सुरू झाल्या. एकमेकांच्या ओळखी आणि स्वागत आज शाळा-शाळांमधून होताना दिसत होते.
कोरोनाच्या पार्श्वभूमीवर आज शाळा ऑनलाइन सुरू झाल्या. शाळा-शाळांमधून शिक्षक आणि विद्यार्थ्यांनी शोसल माध्यमातून एकमेकांना शुभेच्छा दिल्या.
पुरंदर-हवेलीचे आ. संजय जगताप, जिल्हा परिषदेचे सदस्य दत्ता शेठ झुरंगे, पंचायत समिती सदस्या सुनीता कोलते, गटशिक्षणाधिकारी मोहन गायकवाड, ज्येष्ठ पत्रकार शाळेचे मार्गदर्शक बी. एम. काळे यांनी पुरंदर तालुक्यातील कदमवस्ती येथील जिल्हा परिषदेच्या आदर्श शाळेच्या झूम ॲप मिटिंगमध्ये सहभागी होत प्रातिनिधिक स्वरूपात तालुक्यातील शाळा व विद्यार्थ्यांना ऑनलाईन शुभेच्छा दिल्या. स्वागत केले.
आज सकाळी १० वाजता शासकीय निर्णयांचे पालन करीत कदमवस्ती पुरंदरचे गटशिक्षणाधिकारी मोहन गायकवाड, मुख्याध्यापक अनंता जाधव, सहाशिक्षिका सुरेखा जाधव यांनी झूम मिटिंगद्वारे शाळेची सुरुवात केली. आ. संजय जगताप यांनी विद्यार्थी- पालकांशी संपर्क साधून शुभेच्छा व स्वागत केले.
यावेळी संजय जगताप म्हणाले की, पुरंदर तालुक्याची कोविडकाळातही गुणवत्ता चांगली राहिली आहे. शिक्षक आणि पालक-विद्यार्थी यांच्यातील दैनंदिन ऑनलाइन संपर्कामुळे चांगला समन्वय राहिलेला पाहावयास मिळाला. तालुक्यातील विद्यार्थ्यांच्या गुणवत्तेवरही कोरोनाचा कसलाही परिणाम होऊ दिला नाही. कदमवस्ती येथील या शाळेतील विद्यार्थ्यांची शैक्षणिक गुणवत्ता अपेक्षेपेक्षा जास्त राहिली. शाळेच्या शिक्षकांचे यात मोठे योगदान असून ही शाळा एक मॉडेल स्कूल बनवण्यासाठी मी स्वतः पुढाकार घेतलेला आहे.
पुरंदर तालुक्यातील ३०२ शाळा आजपासून ऑनलाइन सुरू होत आहेत. त्याचबरोबर पुढील १५ दिवस दाखलपात्र विद्यार्थ्यांना शाळांतून प्रवेश घेण्यासाठी पटनोंदणी पंधरवडाही सुरू झाला आहे. प्रत्येक दाखल पात्र विद्यार्थ्यांना शाळांतून प्रवेश दिला जाणार आहे. ऑनलाइन शाळा सुरू असताना दररोज पहिली ते नववी पर्यंतच्या शिक्षकांची ५० टक्के, तर दहावी-बारावीच्या शिक्षकांची १०० टक्के शाळेत उपस्थिती आवश्यक आहे. ऑनलाइन शाळा सुरू झाल्याने अनेक विद्यार्थ्यांकडे मोबाईल नसल्याचेही निदर्शनास आलेले आहे. अशा वेळी या विद्यार्थ्यांना मदत करण्यासाठी पालक मित्र, अथवा सामाजिक संस्थांनी पुढाकार घेऊन मदतीचा हात द्यावा असे आवाहन गट शिक्षणाधिकारी मोहन गायकवाड यांनी केले.
यावेळी साकुर्डे ग्राम पंचायतीचे सरपंच रमेश जाधव, सदस्य अजित जाधव, शाळा व्यवस्थापन समितीचे अध्यक्ष कदम, पालक बबन कदम, हनुमंत कदम, संपत गरुड, उमेश जाधव, श्रीकांत सस्ते, विशाल चव्हाण, संजय चव्हाण उपस्थित होते. पहिल्याच दिवशी विद्यार्थ्यांना प्रवेश देण्यात आला. शालेय पाठ्यपुस्तके ही देण्यात आली.
स्वागत सरपंच रमेश जाधव यांनी केले, तर आभार मुख्याध्यापक अनंता जाधव यांनी केले
फोटो मेल केला आहे कदमवस्ती शाळेतील झूम मिटिंग द्वारे शैक्षणिक वर्षाला सुरुवात