घरकुलाची जागा बनली कचरा डेपो

नगर परिषदेने शहरातील आर्थिक दुर्बल मागासवर्गीयांच्या एकत्रित घरकुलांसाठी जागा आरक्षित केली.

इंदापूर : नगर परिषदेने शहरातील आर्थिक दुर्बल मागासवर्गीयांच्या एकत्रित घरकुलांसाठी जागा आरक्षित केली. त्या जागेवर घरांऐवजी केरकचरा, मेलेली जनावरे, भटकी कुत्री, दुर्गंधी व अस्वच्छता नांदत असून, एकत्रित घरकुलाची योजना हवेत विरली आहे. सन २००७-०८ मध्ये इंदापूर नगर परिषदेच्या एकात्मिक गृहनिर्माण व झोपडपट्टी विकास योजनेसाठी नगर परिषदेने सर्वेक्षण केले होते. प्रत्येकी एक लाख रुपये खर्चाचे २२५ चौरस फूट बांधकाम अंतर्भूत असणारे हॉल, बेडरूम, किचन ओटा, सिंकसह स्वयंपाकघर, टॉयलेट आदी सुविधा असणारे घरकुल, मागासवर्गीय व झोपडपट्टीवासीयांना देण्यात येणार होते. त्यासाठी झोपडपट्टीधारकांची यादी नगर परिषदेने तयार केली होती. त्या यादीनुसार शासकीय कोकतळे (३१), एस.टी. स्टँडमागील परिसर (६२), जावईवाडी (६१), शाहूनगर (७१), साठेनगर रामोशी गल्ली (१३९), आंबेडकरनगर (१३०), म. फुलेनगर (९०), दूध डेअरी वसाहत (३४), बाजारतळ, व्यंकटेशगनर (१०६) असे एकूण ७२४ लाभार्थी निश्चित करण्यात आले होते. लोकांनी चांगला प्रतिसाद दिला. या घरकुलांसाठी जोतिबाच्या मंदिरानजीकची सर्वे नं. ८१० मधील जागा, आरक्षण क्र. १९ नुसार आरक्षित करण्यात आली. मात्र, अचानक ही योजना हवेत विरली. या आरक्षित जागेवर सध्या नगर परिषदेने कचरा डेपो केला आहे. घनकचरा व्यवस्थापनेसंदर्भात मुंबई उच्च न्यायालयाने जे निर्देश दिलेले आहेत, त्याचा कसलाही अंमल होत नाही. ओला व सुका कचरा वेगळा काढणे, रोजचे रोज कचरा उचलला जाणे, गँस प्लांटद्वारे कचर्‍याची विल्हेवाट लावणे, त्यावर वीजनिर्मिती असे काहीही केले जात नाही. जुलैमध्ये कचरा उचलण्यासाठी नवीन गाड्या घेतल्या, त्याचे भाडे वसूल केले जात नाही. मोठ्या गटारी साफ केल्या जात नाहीत. हा सर्व कचरा जेथे टाकला जातो, तेथे पूर्वीपासून जोेतिबाचे मंदिर आहे, लोकवस्तीही आहे. मंदिराच्या पावित्र्याला कचर्‍यामुळे बाधा येत आहे. एकत्रित घरकुलाबरोबरच आॅगस्ट २०११ मध्ये नगरपरिषद हद्दीतील दारिद्र्यरेषेखालील अनुसूचित जाती, नवबौद्ध घटकांसाठी घरकुल योजनेची अंमलबजावणी करण्यासाठी नगरपरिषदेने अर्ज मागविले होते. पुढे त्याचे काय झाले, ही बाबही हवेत विरली आहे.(वार्ताहर)