पुणे : घरकाम करीत असताना गरीब परिस्थितीचा गैरफायदा घेऊन मोलकरीणशी जबरदस्तीने शारीरिक संबंध निर्माण करून त्यांच्या नकळत व्हिडिओ काढून तो पतीला पाठविणाऱ्या घरमालकाविरोधात पोलिसांनी गुन्हा दाखल केला आहे.
हिंमतसिंग धिमान (रा. वृंदावननगर, सैनिकवाडी, वडगाव शेरी) असे गुन्हा दाखल केलेल्याचे नाव आहे.
याप्रकरणी एका ४४ वर्षांच्या महिलेने येरवडा पोलीस ठाण्यात फिर्याद दिली आहे. हा प्रकार जून २०१४ ते मे २०२० दरम्यान घडला आहे.
फिर्यादी या घरकामासाठी आरोपीच्या घरी जात होत्या. त्यावेळी त्यांच्या गरीब परिस्थितीचा गैरफायदा घेऊन धिमान याने या महिलेशी जबरदस्तीने शारीरिक संबंध केले. त्यांच्या नकळत या संबंधाचा व्हिडिओ काढला. त्यानंतर त्यांना ही व्हिडिओ क्लिप फिर्यादीला दाखवून त्याबाबत कोणालाही काही एक सांगू नकोस. मी तुझ्याशी लग्न करतो. तुझ्या दोन मुलांचा सांभाळ करतो, असे आमिष दाखविले. त्याला या महिलेने नकार दिला. तेव्हा त्याने २९ जून २०२१ रोजी तो व्हिडिओ तिच्या पतीच्या व्हॉट्सॲपवर पाठवून व्हायरल केला. वरिष्ठ पोलीस निरीक्षक युनूस शेख तपास करीत आहेत.