बनावट डिग्री तयार करणारे रॅकेट

पुणे विद्यापीठाच्या विविध विद्याशाखांतील अभ्यासक्रमांचे बनावट पदवी प्रमाणपत्र (डिग्री सर्टिफिकेट) सिंगापूर शासनाकडून विद्यापीठाला प्राप्त झाले आहे.

पुणे : पुणे विद्यापीठाच्या विविध विद्याशाखांतील अभ्यासक्रमांचे बनावट पदवी प्रमाणपत्र (डिग्री सर्टिफिकेट) सिंगापूर शासनाकडून विद्यापीठाला प्राप्त झाले आहे. विद्यापीठाने याबाबत स्थापन केलेल्या समितीच्या अहवालातून बनावट प्रमाणपत्र सादर करून परदेशात नोकरी मिळविली जात असल्याचे समोर आले आहे. त्यामुळे शेकडो बनावट पदवी प्रमाणपत्र तयार करणारे रॅकेट अस्तित्वात असल्याची शक्यता व्यक्त केली जात असून, विद्यापीठातर्फे याबाबतचा तपास पोलिसांकडे दिला जाणार असल्याचे अधिकृत सूत्रांनी सांगितले आहे. पुणे विद्यापीठातर्फे पदवी प्रमाणपत्रे खासगी कंपनीकडून तयार करून घेतली जातात. त्यात विद्यापीठाच्या काही माजी कुलगुरूंच्या सह्यांचे स्कॅनिंग करून बनावट पदवी प्रमाणपत्र तयार करण्यात आली आहेत. एवढेच नाही, तर ही प्रमाणपत्रे परदेशात नामांकित कंपन्यांमध्ये नोकरीसाठी सादर करण्यात आली आहेत. विद्यापीठाचे वाणिज्य विद्याशाखेचे अधिष्ठाता डॉ. सुधाकर जाधवर यांच्या अध्यक्षतेखाली नेमलेल्या समितीने यासंदर्भातील अहवाल विद्यापीठाकडे सादर केला. नुकत्याच झालेल्या परीक्षा मंडळाच्या (बीओई) बैठकीत या अहवालावर विस्तृत चर्चा करण्यात आली. तसेच या प्रकरणाचा तपास पोलिसांकडून करून घेण्याचा निर्णयही बैठकीत घेण्यात आला. सिंगापूर येथे नोकरी करत असलेल्या कर्मचार्‍यांच्या पदवी प्रमाणपत्रांच्या पडताळणीत सर्व १८७ प्रमाणपत्रे बनावट असल्याचे निदर्शनास आले. त्यात उत्तर प्रदेश व हरियाणा येथील रहिवासी असल्याचे आढळून येत आहे. तसेच इराणी उमेदवारांनीसुद्धा विद्यापीठाचे बनावट प्रमाणपत्र सादर करून नोकर्‍या मिळविल्याचे दिसून येत आहे. त्यामुळे बनावट पदवी प्रमाणपत्र तयार करण्यात विद्यापीठातील कर्मचार्‍यांचा हात आहे का, याचा तपास करावा लागणार आहे. तसेच विद्यापीठाच्या बाहेरील व्यक्ती बनावट पदवी प्रमाणपत्र तयार करण्याचे रॅकेट चालवत आहेत का, हेसुद्धा पडताळून पाहावे लागणार आहे. त्यासाठी हा तपास सीबीआयने करावा, अशी मागणीही विद्यापीठातर्फे केली जाणार असल्याचे सूत्रांनी सांगितले. (प्रतिनिधी)