सीसीटीव्ही केबलची खोदाई पुन्हा रखडणार

राज्य शासनाच्या वतीने शहराच्या सुरक्षेसाठी विविध भागांत सीसीटीव्ही उभारण्यात येत आहेत.

पुणे : राज्य शासनाच्या वतीने शहराच्या सुरक्षेसाठी विविध भागांत सीसीटीव्ही उभारण्यात येत आहेत. परंतु, पावसाळ्याच्या तोंडावर सीसीटीव्ही केबल खोदाईला महापालिकेने नकार दिला असून, केवळ ओव्हरहेड केबलला परवानगी दिली आहे. जंगली महाराज रस्त्यावरील बॉम्बस्फोटाच्या पार्श्वभूमीवर शहराच्या विविध चौकांत व प्रमुख रस्त्यांवर सीसीटीव्ही उभारण्याचा निर्णय राज्य शासनाने घेतला. त्यानुसार गेल्या सहा महिन्यांपासून शहरातील प्रमुख रस्त्यांभोवती खोदाई शुल्क माफ करून सीसीटीव्ही केबलसाठी खोदाई सुरू होती. परंतु, पावसाळ्याच्या पार्श्वभूमीवर महापालिकेने १५ एप्रिलपासूनच शहरातील रस्त्यांवर खोदकामास मनाई केली. शहरांत सीसीटीव्हीसाठी रस्ते खोदाई करताना नागरिकांना मनस्ताप सहन करावा लागला होता. त्यामुळे, केबलसाठीही पालिकेने खोदाईची परवानगी तातडीने थांबविली होती. मात्र, गेल्या आठवड्यात उपमुख्यमंत्री अजित पवार यांच्यासोबतच्या बैठकीत सीसीटीव्ही केबलसाठी एक महिन्याची मुदत देण्याच्या सूचना देण्यात आल्या होत्या. दरम्यान, मॉन्सूनपूर्व वळवाच्या पावसाने पुण्यात हजेरी लावली आहे. त्यामुळे रस्त्याभोवतीची खोदाई तातडीने थांबणे गरजेचे आहे. अंदमानात धडकलेला मॉन्सून जूनच्या पहिल्या अथवा दुसर्‍या आठवड्यात दाखल होण्याची शक्यता वर्तविली जात आहे. खोदाईमुळे रस्त्यावर खड्ड्यांची समस्या पुन्हा उद्भवू शकते. त्यामुळे महापालिकेने सीसीटीव्हीसाठी खोदाईची परवानगी अद्याप दिलेली नाही. मात्र, दरम्यानच्या काळात ओव्हरहेड केबलला महापालिकेची कोणतीही हरकत नसल्याचे पथ विभागाच्या अधिकार्‍यांनी सांगितले.(प्रतिनिधी)