गतिरोधकावरून ‘जम्प’ घेतली; नियंत्रण सुटून कारला धडक, दुचाकीस्वाराचा मृत्यू

दुचाकीने कारला धडक दिली असून या अपघातात दुचाकीस्वाराचा मृत्यू झाला तर त्याच्यासोबतचा दुचाकीस्वार जखमी झाला.

पिंपरी : दुचाकी आणि कारचा अपघात झाला. या अपघातात दुचाकीस्वाराचा मृत्यू झाला. ही घटना मंगळवारी (दि. १७ मार्च) मुळशी तालुक्यातील माण येथे घडली.

पोलिसांनी दिलेल्या माहितीनुसार, मिलन शेख (वय २२, रा. बोडकेवाडी, माण, ता. मुळशी, मूळ रा. मुर्शीदाबाद, पश्चिम बंगाल) असे अपघातात मृत्यू झालेल्या दुचाकीस्वाराचे नाव आहे. विकी दादा औघडे (वय २२, रा. माण, ता. मुळशी, मूळ रा. जुनोनी, ता. मंगळवेढा, जि. सोलापूर) यांनी मंगळवारी (दि. १७) याबाबत हिंजवडी पोलिस ठाण्यात फिर्याद दिली आहे.

मिलन शेख आणि त्याच्यासोबत एकजण दुचाकीवरून जात होता. त्यावेळी रस्त्यातील गतिरोधकावरून मिलन याच्या दुचाकीने ‘जम्प’ घेतली. त्यामुळे मिलन शेख याचे दुचाकीवरून नियंत्रण सुटले. त्यानंतर दुचाकीने फिर्यादी यांच्या कारला धडक दिली. या अपघातात मिलन शेख याचा मृत्यू झाला तर त्याच्यासोबतचा दुचाकीस्वार जखमी झाला.