Pune: तरुणीने पाचव्या मजल्यावरून उडी घेत संपवले जीवन; पुण्याच्या शनिवारवाड्याजवळील धक्कादायक घटना

Pune Incident: इमारतीत राहणाऱ्या नागरिकांनीही तिला ओळखले नाही. त्यामुळे बाहेर येऊन या तरूणीने इमारतीवरून उडी मारली असावी असाही तर्क लावला जात आहे

पुणे : शहराचा मध्यवर्ती भाग असलेल्या भाऊ रंगारी मार्गावरील एका पाच मजली रहिवासी इमारतीवरून एका महिलेने उडी मारून आत्महत्या केली. गुरुवारी (दि. २७) सायंकाळी साडेसहाच्या सुमारास हरिहरेश्वर नावाच्या इमारतीत ही घटना घडली.

मानसी भगवान गोपालघरे (२०, रा. पांडुरंग इमारत, बुधवार पेठ) असे आत्महत्या केलेल्या महिलेचे नाव आहे. घारे यांचे लग्न झाले असून त्या मूळच्या अहिल्यानगर जिल्ह्यातील आहेत. त्यांनी आत्महत्या का केली? याचे कारण अद्याप स्पष्ट झालेले नाही. या प्रकरणी विश्रामबाग पोलिस ठाण्यात अकस्मात मृत्यूचा गुन्हा नोंदवण्यात येत आहे.

ज्या ठिकाणी ही घटना घडली तो संपूर्ण परिसर अतिशय गजबजलेला असतो. तसेच घारे यांनी ज्या इमारतीवरून उडी मारली त्या इमारतीत स्पर्धा परीक्षेचा अभ्यास करणारे विद्यार्थी राहत आहेत. या घटनेमुळे परिसरात गोंधळ निर्माण झाला होता. उडी मारल्यानंतर मोठा आवाज झाल्याने परिसरातील नागरिक घटनास्थळी धावले असता इमारतीखाली रक्ताच्या थारोळ्यात ही महिला पडल्याचे दिसून आले. त्यानंतर नागरिकांनी लगेच पोलिसांना याची माहिती दिली. विश्रामबाग पोलिसांनी तात्काळ घटनास्थळी पोहोचून पंचनामा आणि तपासाची प्रक्रिया सुरू केली.