पुणे : भरधाव ट्रकने दुचाकीला धडक दिल्याने सहप्रवासी तरुणाचा मृत्यू झाल्याची घटना सिंहगड रस्ता भागातील वडगाव उड्डाणपुलावर घडली. भरधाव ट्रकने उड्डाणपुलावरून निघालेल्या दोन कारला धडक दिली. अपघातात दोन कारचे नुकसान झाले, तसेच दुचाकीस्वार तरुण जखमी झाला. अपघातानंतर पसार झालेल्या ट्रकचालकाला सिंहगड रोड पोलिसांनी अटक केली.
किरण पवार (२५, रा. श्रमसाफल्य काॅलनी, कर्वेनगर) असे मृत्युमुखी पडलेल्या सहप्रवासी तरुणाचे नाव आहे. अपघातात दुचाकीस्वार यश जयप्रकाश किरदत्त (२५, रा. श्रमसाफल्य काॅलनी, कर्वेनगर) गंभीर जखमी झाला. त्याच्यावर रुग्णालयात उपचार सुरू आहेत. याप्रकरणी ट्रकचालक महंतेश श्रीकांत अंदोडगी (३७, रा. गोलसर, ता. इंडी, जि. विजयपूर, कर्नाटक) याला अटक करण्यात आली. याबाबत यश किरदत्त याने सिंहगड रोड पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, दुचाकीस्वार यश किरदत्त आणि त्याचा मित्र किरण पवार हे मुंबई-बंगळुरू बाह्यवळण मार्गावरील वडगाव उड्डाणपुलावरून रविवारी (दि. २२) पहाटे सव्वापाचच्या सुमारास निघाले होते. त्यावेळी भरधाव ट्रकने दुचाकीला पाठीमागून धडक दिली. अपघातानंतर भरधाव वेगात ट्रकचालक पसार झाला. त्यावेळी उड्डाणपुलावरून निघालेल्या दोन कारला धडक दिली. अपघाताची माहिती मिळताच वरिष्ठ पोलिस निरीक्षक दिलीप दाईंगडे, गुन्हे शाखेचे निरीक्षक उत्तम भजनावळे यांनी घटनास्थळी भेट दिली. अपघातात गंभीर जखमी झालेला दुचाकीस्वार यश अणि त्याचा मित्र किरण यांना खासगी रुग्णालयात दाखल करण्यात आले. उपचारापूर्वीच किरण याचा मृत्यू झाला होता. पसार झालेला ट्रकचालक अंदोडगी याला ताब्यात घेण्यात आले. रात्री उशिरा त्याला अटक करण्यात आली. पोलिस उपनिरीक्षक मालुसरे पुढील तपास करत आहेत.
उड्डाणपुलावर तिसरा अपघात...
वडगाव उड्डाणपुलावर दोन महिन्यांपूर्वी मित्रांसोबत पार्टी करुन निघालेल्या कारचालकाने दुचाकीला धडक दिली होती. अपघातात एका तरुणाचा मृत्यू झाला होता. अपघातानंतर भरघाव कार उड्डाणपुलावरून रस्त्यावर कोसळली होती. अपघातात कारचालकासह त्याच्याबरोबर असलेले मित्र जखमी झाले होते. यापूर्वी वडगाव उड्डाणपुलावर ट्रकच्या धडकेत दुचाकीस्वाराचा मृत्यू झाल्याची घटना घडली होती.