मंचर: अल्पवयीन मुलीला पळवून नेऊन तिच्यावर बलात्कार करणाऱ्या जावेद मुखतार शेख (वय 22 रा. मंचर एस कॉर्नर) याच्या विरोधात मंचर पोलिसांनी बाल लैंगिक अपराध प्रतिबंधक कायदा व बलात्काराचा गुन्हा दाखल केला आहे. पोलिसांनी शेख याला अटक करून त्याची रवानगी येरवडा कारागृहात केली आहे.
मंचर पोलिसांनी दिलेल्या माहितीनुसार पीडित अल्पवयीन मुलगी सोळा वर्षाची असताना जावेद शेख याने 23 मार्च 2019 रोजी तिला मंचर येथून पळवून नेले. याबाबत मंचर पोलीस ठाण्यात गुन्हा दाखल झाला होता.त्यानंतर 16 मे 2023ला यातील पीडित व तिचे नातेवाईक मंचर पोलीस ठाण्यात आले. यातील आरोपी जावेद मुख्तार शेख याला पोलिसांनी 17 मे रोजी अटक केली असून सध्या आरोपी येरवडा कारागृह पुणे येथे न्यायालयीन कोठडीमध्ये आहे. दरम्यान पीडित मुलीला वैद्यकीय तपासणीसाठी मंचर उपजिल्हा रुग्णालयात पाठवले असता वैद्यकीय अधिकारी यांनी पीडितेस पुढील उपचारासाठी पुणे येथील ससून रुग्णालयात पाठवले होते. उपचार झाल्यानंतर सदर पीडित मुलीकडे तपास करून तिचा जबाब घेतला असता जावेद मुख्तार शेख यांने सदरची मुलगी अल्पवयीन असल्याचे माहित असताना देखील बलात्कार केला. तिचा जबाब व वैद्यकीय तपास अहवालाच्या अनुषंगाने पोलिसांनी बलात्कार तसेच बाल लैंगिक अत्याचार प्रतिबंधक कायद्याप्रमाणे जावेद शेख याच्या विरुद्ध गुन्हा दाखल केला आहे. या प्रकरणाचा पुढील तपास उपविभागीय पोलीस अधिकारी सुदर्शन पाटील करत आहेत. दरम्यान हा लव जिहादचा प्रकार असल्याचा आरोप भाजपा आमदार गोपीचंद पडळकर यांनी केला होता. याप्रकरणी दोषींवर कडक कारवाई करण्याची मागणी अनेक संघटनांनी केली होती.