बंदी झुगारून पर्यटकांचा जीवाशी खेळ; कुंडमळा येथील सूचना फलकांकडे दुर्लक्ष, तरुणांचीही हुल्लडबाजी

आनंदाच्या भरात आणि मोबाइलमध्ये सेल्फी, व्हिडीओ टिपण्याच्या नादात बंदीला झुगारून उत्साही पर्यटक पाण्यात उतरतात

तळेगाव दाभाडे : शेलारवाडीजवळील कुंडमळा येथील इंद्रायणीवरील साकव पूल कोसळून रविवारी मोठी दुर्घटना घडली. यात अनेक पर्यटकांना आपले प्राण गमवावे लागले. सुटीच्या दिवशी या भागात पर्यटक मोठी गर्दी करतात. पुलावर जाण्यास बंदी असतानाही सोशल मीडियावरील रील्स पाहून तसेच व्हिडीओ, फोटो काढण्यासाठी पुलावर जातात. हाच पूल रविवारी पर्यटकांसाठी मृत्यूचा सापळा ठरला.

इंद्रायणीनदीच्या प्रवाहामध्ये मोठे भोवरे व रांजणखळगे आहेत. येथील निसर्गसौंदर्य विलोभनीय आहे. हे टिपण्यासाठी शनिवार, रविवारी तसेच सुट्यांच्या दिवशी पर्यटक गर्दी करतात. आनंदाच्या भरात आणि मोबाइलमध्ये छायाचित्र, व्हिडीओ टिपण्याच्या नादात येथील बंदीला झुगारतात काही उत्साही पर्यटक रांजण खळग्यांमुळे पाण्यात उतरतात. सुरक्षारक्षक नसल्यास काही हुल्लडबाज तरुण वाहत्या पाण्यात उतरून जीव धोक्यात घालतात. परिसरात लावलेल्या सूचना फलकाकडे कोणीही लक्ष देत नाहीत. त्यामुळे जीव गमावण्याची वेळ पर्यटकांवर येते.

इंद्रायणी नदीच्या पात्राजवळ कोणी जाऊ नये. नदीच्या पाण्यात पोहण्यास उतरू नये. पाण्याजवळ जाऊन सेल्फी काढू नये. नदीच्या प्रवाहामध्ये मोठे भोवरे व रांजणखळगे आहेत. तुमच्या घरी कोणीतरी तुमची वाट पाहत आहे याची जाण असू द्या, अशा प्रशासकीय सूचनांकडे पर्यटक दुर्लक्ष करतात.

नदीपात्रात तरुण करतात मद्यपान

अनेकांना नदीपात्रात उतरून फोटो काढण्याचा मोह आवरत नाही. परंतु या भागाची अनेक पर्यटकांना माहिती नसल्याने पाण्यात बुडण्याच्या घटना घडत असतात. काही तरुण तर नदीपात्रात मद्यपान करीत बसलेले असतात. त्यांच्यावर कोणाचाही अंकुश नसतो.