मालकाने कोणतीही सुरक्षा साधने पुरवली नाहीत; कामगाराने गमावला जीव, चिखली येथील घटना

कंपनीत सुटे भाग बनवताना यंत्राचे भाग उडून कामगारांचा जीव जाऊ शकतो याची कल्पना असतानाही मालकाने कोणतीही सुरक्षा साधने पुरवली नव्हती

पिंपरी : कंपनीमध्ये काम करत असताना सुरक्षेच्या उपाययोजना न केल्यामुळे एका ४१ वर्षीय कामगाराला आपला जीव गमवावा लागला. ही घटना बुधवारी (दि. १८ फेब्रुवारी) दुपारी दोनच्या सुमारास चिखली येथील साने इंडस्ट्रीजमधील नवतेज प्रेसिंग अँड इंजिनिअरिंग कंपनीत घडली.

सुनील व्यंकट बडघे (वय ४१, रा. मोरे वस्ती, चिखली) असे मृत्यू झालेल्याचे नाव आहे. या प्रकरणी पोलिस अंमलदार अक्षय शिळीमकर यांनी फिर्याद दिली आहे. पोलिसांनी कंपनी मालक अशोक जगन्नाथ वराडे (७०, रा. संभाजीनगर, चिंचवड) यांच्या विरोधात गुन्हा दाखल केला आहे.

पोलिसांनी दिलेल्या माहितीनुसार, अशोक वराडे यांची नवतेज प्रेसिंग अँड इंजिनिअरिंग नावाची चिखली येथे कंपनी आहे. त्यामध्ये वाहनांचे सुटे भाग बनवले जातात. हे सुटे भाग बनवताना यंत्राचे भाग उडून कामगारांचा जीव जाऊ शकतो याची कल्पना असतानाही मालकाने कोणतीही सुरक्षा साधने पुरवली नव्हती. यामुळे सुनील बडघे या कामगाराचा कामादरम्यान मृत्यू झाला.