Mangesh Kalokhe: बायकोचा पराभव, 20 लाखांत सुपारी, पुण्याचे आरोपी, रेकी केली अन् रस्त्यातच घेतला जीव; Inside Story

राज्यभरात चर्चेचा विषय ठरलेल्या मंगेश काळोखे हत्या प्रकरणात धक्कादायक माहिती समोर आली आहे. पोलिसांनी केलेल्या तपासानंतर या प्रकरणाचे पुणे कनेक्शनही उघड झाले आहे.

रायगडसह कोकणाला हादरवून टाकणाऱ्या माजी नगरसेवक मंगेश काळोखे हत्या प्रकरणाचा उलगडा करण्यात पोलिसांना अखेर यश आले आहे. पोलिसांनी हत्या प्रकरणात पुण्यातून आरोपीला अटक केली आहे.

मंगेश काळोखे यांची २६ डिसेंबर रोजी म्हणजे नगरपरिषद, नगरपंचायत निवडणुकीचे निकाल जाहीर झाल्यानंतर हत्या करण्यात आली होती. त्यांच्या हत्येची तिघांना २० लाख रुपयांमध्ये सुपारी देण्यात आली होती, हे स्पष्ट झाले आहे.

मंगेश काळोखे हत्या प्रकरणात पुणे कनेक्शनही समोर आले आहे. या हत्या प्रकरणातील मुख्य आरोपी रवींद्र देवकर याने इशा पापा शेख हिच्या मार्फत हत्या करणाऱ्यांना सुपारी दिली होती. आदिल मुखत्यार शेख, खालीद खलील कुरेश आणि आणखी एकजण अशा तिघांना २० लाखात सुपारी दिली गेली होती, असे पोलिसांनी सांगितले.

मुख्य आरोपी आणि हत्या करणारे यांच्यातील आर्थिक व्यवहार, मोबाईलवरून केलेले कॉलची माहिती, तसेच आरोपींनी दिलेली माहिती यावरून हत्येचा सगळा कट समोर आला.

फरार आरोपीला वानवडी पोलिसांनी अटक केली. खालीद खलील कुरेशी (२३) असे या आरोपीचे नाव आहे. त्याला सोनसाखळी चोरीच्या गुन्ह्यात खलीलचे नाव समोर आले होते. तपासात खालीद हडपसरमधील हांडेवाडी भागात येणार असल्याची माहिती पोलिसांना मिळाली. त्याला सापळा लावून ताब्यात घेतले. चौकशीत त्याने काळोखे यांचा दोन मित्रांच्या साथीने खून केल्याची कबुली दिली.

खोपोली नगरपालिका निवडणुकीत मंगेश काळोखे यांच्या पत्नी मानसी काळोखे या उर्मिला देवकर यांचा पराभव करून विजयी झाल्या होत्या. देवकर आणि काळोखे या कुटुंबाचे आधीपासूनच वैर होते. या कारणाने पोलिसांनी दोन दिवस चोख बंदोबस्त दोघांच्या घराशेजारी तैनात केला होता.

मंगेश यांनी रवींद्र देवकर यांना पूर्वीच मारण्याची धमकी दिली होती. काळोखे यांच्यावरही अनेक गुन्हे दाखल होते. पत्नीचा पराभव आणि पूर्वीचे वैर याचा राग मनात ठेवून रवींद्र देवकर यांनी काळोखे यांना मारण्याची सुपारी दिली होती.