FD करुन तुम्ही कधीही श्रीमंत होणार नाही? CA ने दिला इशारा, म्हणाले खऱ्या कमाईसाठी गुंतवणूक धोरण बदला

FD vs Inflation : देशातील अनेक नोकरदार लोक आणि कुटुंबं आजही आपल्या बहुतांश कमाईसाठी मुदत ठेव हाच सर्वात सुरक्षित गुंतवणुकीचा पर्याय मानतात. मात्र, केवळ एफडीवर विसंबून राहणाऱ्या गुंतवणूकदारांसाठी एक डोळे उघडणारी बातमी आहे.

चार्टर्ड अकाउंटंट नितीन कौशिक यांनी अलीकडेच X (पूर्वीचे ट्विटर) वर एक पोस्ट शेअर करून भारतीय बचतदारांना सावध केले आहे. त्यांच्या मते, फक्त एफडीमध्ये पैसा ठेवणे म्हणजे एक 'शांत संपत्तीचा सापळा' आहे. या सापळ्यात तुमचा पैसा सुरक्षित दिसत असला तरी, महागाईमुळे त्याची वास्तविक किंमत हळूहळू कमी होत जाते.

कौशिक यांनी सांगितले की, आज एफडीचे दर सुमारे ६.३% ते ७% वार्षिक आहेत, तर देशातील महागाईचा दर सुमारे २.१% आहे. महागाईचा दर वजा केल्यास तुमचा वास्तविक परतावा फक्त ४.२% ते ४.९% च्या दरम्यान राहतो.

जर तुम्ही १० लाख रुपये एफडीमध्ये ठेवले, तर एका वर्षानंतर महागाईमुळे तुमच्या पैशाची खरेदी क्षमता फक्त १०.४२ लाख रुपयांच्या आसपासच राहील. म्हणजे, तुमचा पैसा वाढण्याऐवजी, त्याची वस्तू खरेदी करण्याची क्षमता कमी होत आहे.

या धोक्याची जाणीव असूनही, भारतातील सुमारे ७०% कुटुंबे आजही एफडीलाच बचतीचे सर्वात विश्वसनीय माध्यम मानतात. कारण, लोक 'सुरक्षिततेच्या' आश्वासनावर विश्वास ठेवतात, तसेच आर्थिक साक्षरतेची कमतरता आणि बाजारातील अस्थिरतेची भीती यामुळे एफडीचा मार्ग निवडतात.

कौशिक यांनी सावध दिली की, एफडीची ही सुरक्षितता तोपर्यंतच आहे, जोपर्यंत महागाई दर कमी आहे. महागाई वाढताच, एफडीतून मिळणारे व्याज ठरते आणि तुमची खरी संपत्ती कमी होऊ लागते.

कौशिक यांचा स्पष्ट सल्ला आहे की, एफडीवर अवलंबून न राहता गुंतवणूकदारांनी आपल्या पोर्टफोलिओमध्ये विविधीकरण करावे. यामुळे चक्रवाढ व्याजाचा फायदा मिळतो आणि वाढीच्या संधी खुल्या होतात.

त्यांनी गुंतवणूकदारांना त्यांच्या पोर्टफोलिओमध्ये काही मालमत्तांचा समावेश करण्याची शिफारस केली. १. इक्विटीज : १२% ते १५% चक्रवाढ वार्षिक वाढीचा दर (CAGR) मिळवण्याची क्षमता. २. डेट फंड्स : ६.५% ते ८% पर्यंत परतावा. ३. महागाईरोधक ॲसेट्स: सोने किंवा आरईआयटी यांचा समावेश करावा, जे महागाईच्या काळात संपत्तीचे संरक्षण करतात.

शेअर बाजारातील तज्ज्ञांचेही मत आहे की, केवळ सुरक्षित गुंतवणुकीवर विसंबून राहणे दीर्घकाळात नुकसानदायक ठरू शकते. त्यामुळे ग्रोथसाठी जोखीम घेऊन गुंतवणूक करणे गरजेचे आहे.

(टीप - यामध्ये सामान्य माहिती देण्यात आलेली आहे. हा गुंतवणूकीचा सल्ला नाही. शेअर बाजारातील गुंतवणूक जोखमीच्या अधीन असते. कोणत्याही प्रकारची गुंतवणूक करण्यापूर्वी या क्षेत्रातील जाणकार किंवा तज्ज्ञांचा सल्ला घेणं आवश्यक आहे.)