नेरुळ-उरण मार्गाला डिसेंबरचा मुहूर्त

नेरुळ-उरण रेल्वेमार्गाच्या पहिल्या टप्प्याच्या कामाने गती घेतली आहे. डिसेंबरअखेरपर्यंत या मार्गावर खारकोपरपर्यंत प्रत्यक्ष लोकलसेवा

लोकमत न्यूज नेटवर्कनवी मुंबई : नेरुळ-उरण रेल्वेमार्गाच्या पहिल्या टप्प्याच्या कामाने गती घेतली आहे. डिसेंबरअखेरपर्यंत या मार्गावर खारकोपरपर्यंत प्रत्यक्ष लोकलसेवा सुरू करण्याच्या दृष्टीने रेल्वे प्रशासनाने हालचाली सुरू केल्या आहेत. त्यानुसार दोन दिवसांपूर्वी या मार्गाची चाचपणी करण्यात आली. विशेष म्हणजे, पहिल्या टप्प्यातील लोकलसेवेसाठी यापूर्वी जुलैचा मुहूर्त देण्यात आला होता; परंतु विविध कारणांमुळे काम रखडल्याने आता डिसेंबर २0१७चा मुहूर्त निश्चित करण्यात आला आहे. मानखुर्द-पनवेल व ठाणे-पनवेल या दोन रेल्वे प्रकल्पांमुळे नवी मुंबईच्या विकासाला मोठ्या प्रमाणात हातभार लागला आहे. या प्रकल्पात सिडकोचे मोठे योगदान राहिले आहे. या दोन मोठ्या प्रकल्पांपाठोपाठ सिडकोने जुलै १९९७मध्ये नेरुळ-उरण या २७ कि.मी. लांबीच्या रेल्वेमार्गाचा प्रस्ताव तयार केला होता; परंतु विविध कारणांमुळे हा प्रकल्प कागदावरच सीमित राहिला होता. असे असले तरी सिडकोच्या सातत्यपूर्ण पाठपुराव्याला यश येऊन, अखेर जून २0१२पासून या प्रकल्पाच्या प्रत्यक्ष कामाला सुरुवात करण्यात आली. सिडको व रेल्वे यांच्या संयुक्त सहकार्याने उभारण्यात येत असलेल्या या मार्गावर १0 स्थानके आहेत, तर या संपूर्ण प्रकल्पाचा खर्च १७८२ कोटी रुपये इतका आहे. हा प्रस्ताव तयार केला, तेव्हा या प्रकल्पाचा खर्च केवळ १४१२ कोटी रुपये इतका निर्धारित करण्यात आला होता. या संपूर्ण मार्गावर चार उड्डाणपूल बांधण्यात येणार आहेत. त्यापैकी उलवे खाडीवरील सर्वात मोठ्या उड्डाणपुलाचे काम पूर्ण झाले आहे. सध्या या मार्गावरील पाचव्या क्रमांकाच्या खारकोपर स्थानकाचे काम पूर्ण होत आले आहे. शेवटच्या टप्प्यातील काही कामे प्रगतिपथावर आहेत; परंतु विविध कारणांमुळे ही कामे अत्यंत संथ गतीने सुरू आहेत. त्यामुळे जुलैचा मुहूर्त टळल्याचे सिडकोकडून स्पष्ट करण्यात आले आहे. असे असले, तरी पुढील पाच महिन्यांत उर्वरित कामे पूर्ण करून डिसेंबरमध्ये खारकोपरपर्यंत लोकलसेवा सुरू करण्याच्या दृष्टीने रेल्वेने कंबर कसली आहे. त्याचाच एक भाग म्हणून दोन दिवसांपूर्वी रेल्वेकडून खारकोपरपर्यंतच्या मार्गाची चाचपणी करण्यात आली.दुसऱ्या टप्प्याला भूसंपादनाचा अडथळानेरुळ-उरण या मार्गावर एकूण १0 रेल्वेस्थानके आहेत. यात सीवूड, सागरसंगम, तरघर, बामणडोंगरी, खारकोपर या पहिल्या टप्प्यातील पाच स्थानकांची कामे पूर्णत्वास आली आहेत. त्यापुढील गव्हाण, रांजणपाडा, न्हावा-शेवा, डोंगरी व उरण या पाच स्थानकांचे काम भूसंपादन व इतर कारणांमुळे रखडले आहे. या संपूर्ण मार्गावर १५ ठिकाणी भुयारीमार्ग, तर ७८ छोट्या नाल्यांचा समावेश आहे.