फाशीपासून वाचला, NIA कोर्टाने यासिन मलिकला सुनावली जन्मठेपेची शिक्षा
By ऑनलाइन लोकमत | Published: May 25, 2022 06:27 PM2022-05-25T18:27:54+5:302022-05-25T19:03:53+5:30
Yasin Malik sentenced to life imprisonment : सुनावणीदरम्यान एनआयएने (NIA) यासिन मलिकला फाशी देण्याची मागणी केली होती.मात्र, फाशीऐवजी मलिकला कोर्टाने जन्मठेपेची शिक्षा सुनावली आहे.
फाशीपासून वाचला, NIA कोर्टाने यासिन मलिकला सुनावली जन्मठेपेची शिक्षा
Next नवी दिल्ली : दहशतवाद्यांना पैसा पुरविल्याप्रकरणी काश्मीरमधील फुटीरतावादी नेता यासीन मलिक याला दिल्लीतील विशेष न्यायालयाने दोषी ठरविले आहे. त्याला द्यावयाच्या शिक्षेसंदर्भात युक्तिवाद २५ मे रोजी म्हणजेच आज न्यायालयात पार पडला आहे. बेकायदेशीर कृत्ये प्रतिबंधक कायद्यान्वये यासीन मलिकवर गुन्हे दाखल करून त्याच्यावर हा खटला चालविण्यात आला. आता दोन्ही पक्षाचा युक्तिवाद पार पडल्यानंतर यासिन मलिकला जन्मठेपेची शिक्षा सुनावली आहे. तसेच १० लाख रुपये दंड भरण्यास कोर्टाने सांगितलं आहे.
दिल्लीच्या पटियाला हाऊस कोर्टाने (NIA Court ) यासिन मलिकच्या शिक्षेच्या कालावधीवर आज सुनावणी पूर्ण केली. आता यासिन मलिकच्या शिक्षेवर न्यायालयाने निकाल दिला आहे. सुनावणीदरम्यान एनआयएने (NIA) यासिन मलिकला फाशी देण्याची मागणी केली होती.मात्र, फाशीऐवजी मलिकला कोर्टाने जन्मठेपेची शिक्षा सुनावली आहे.
#BreakingNews : नवी दिल्ली - फुटीरतावादी नेता यासीन मलिकला जन्मठेपेची शिक्षा #YasinMalik#Yasin_Malik#Kashmir#YasinConvictedpic.twitter.com/UK1m8cm9rY
— Lokmat (@lokmat) May 25, 2022
यासीनला कडक बंदोबस्तात न्यायालयात हजर करण्यात आले. यासीन मलिकला गेल्या सुनावणीत न्यायालयाने दोषी ठरवले होते आणि यासिनने दहशतवादासाठी वित्तपुरवठा प्रकरणी सर्व आरोप स्वीकारले होते. यात बेकायदेशीर क्रियाकलाप प्रतिबंध कायदा (UAPA) अंतर्गत आरोपांचा समावेश आहे. 19 मे रोजी पटियाला हाऊस न्यायालयाचे विशेष न्यायाधीश प्रवीण सिंग यांनी मलिकला दोषी ठरवले होते.
Terror funding case | NIA Court in Delhi awards life imprisonment to Yasin Malik. pic.twitter.com/mxwH3dhWLc
— ANI (@ANI) May 25, 2022
यासीनने सर्व आरोप मान्य केले होते
जम्मू काश्मीर लिबरेशन फ्रंटचा प्रमुख मलिक यांने त्याच्यावर लावलेल्या आरोपांना विरोध केला नाही. आरोपांमध्ये UAPA ची कलम 16 (दहशतवादी कृत्ये), 17 (दहशतवादी कृत्यांसाठी निधी गोळा करणे), 18 (दहशतवादी कट रचणे) आणि 20 (दहशतवादी टोळी किंवा संघटनेचा सदस्य असणे), भारतीय दंड 120-बी(गुन्हेगारी कट) आणि 124-A (देशद्रोह) ही कलमे लावली आहेत. जम्मू-काश्मीर लिबरेशन फ्रंट ही UAPA अंतर्गत प्रतिबंधित दहशतवादी संघटना आहे.
यासीन व्यतिरिक्त कोण दोषी?
न्यायालयाने यापूर्वी फारुख अहमद दार उर्फ बिट्टा कराटे, शाबीर शाह, मसरत आलम, मोहम्मद युसुफ शाह, आफताब अहमद शाह, अल्ताफ अहमद शाह, नईम खान, मोहम्मद अकबर खांडे, राजा मेहराजुद्दीन कलवाल, बशीर अहमद भट, जहूर अहमद शाह वताली, फरार अहमद शाह, फरार अहमद शाह यांना अटक केली होती. शब्बीर अहमद शाह, अब्दुल रशीद शेख आणि नवलकिशोर कपूर यांच्यासह काश्मिरी फुटीरतावादी नेत्यांवर औपचारिकपणे आरोप निश्चित करण्यात आले आहेत.
कोण यासिन मलिक?
यासिन मलिकचा जन्म 3 एप्रिल 1966 रोजी श्रीनगरमधील मैसुमा येथे झाला. यासीनचे वडील गुलाम कादिर मलिक हे सरकारी बस चालक होते. यासीनचे संपूर्ण शिक्षण श्रीनगरमध्ये झाले. त्याने श्री प्रताप महाविद्यालयातून पदवीचे शिक्षण घेतले आहे. यासीन मलिकने जम्मू काश्मीर लिबरेशन फ्रंट या प्रतिबंधित संघटनेचा प्रमुख बनण्यापर्यंतची गोष्ट एका मुलाखतीत सांगितली होती. त्यात त्याने दावा केला होता की, काश्मीरमध्ये लष्कराचे अत्याचार पाहून आपण शस्त्र उचलले. यासीनने 80 च्या दशकात 'ताला पार्टी' स्थापन केली होती, ज्याद्वारे त्याने काश्मीर खोऱ्यात अनेक दहशतवादी घटना घडवून आणल्या.
1986 मध्ये मलिकने 'ताला पार्टी'चे नाव बदलून 'इस्लामिक स्टुडंट्स लीग' (ISL) केले. यामध्ये तो फक्त काश्मीरमधील तरुणांचा समावेश करायचा. काश्मीरला भारतापासून वेगळे करणे हा त्याचा उद्देश होता. काश्मीरमध्ये अनेक दहशतवादी घटना घडवून आणणाऱ्या अशफाक मजीद वानी, जावेद मीर आणि अब्दुल हमीद शेख या दहशतवाद्यांचा आयएसएलमध्ये समावेश होता.
1988 मध्ये जम्मू काश्मीर लिबरेशन फ्रंट (JKLF) मध्ये सामील झाल्यानंतर काही दिवसांनी तो पाकिस्तानला गेला. येथे प्रशिक्षण घेतल्यानंतर 1989 मध्ये भारतात परतला. यानंतर त्याने गैर-मुस्लिमांना मारण्यास सुरुवात केली. 8 डिसेंबर 1989 रोजी देशाचे तत्कालीन गृहमंत्री मुफ्ती मोहम्मद सईद यांची मुलगी रुबिया सईद हिचे अपहरण करण्यात आले होते.