‘सनबर्न’ला मान्यतेची प्रतीक्षा !

गोव्यातील लोकप्रिय सनबर्न आणि सुपरसॉनिक या दोन संगीत महोत्सवांना प्रारंभ होण्यास केवळ एक दिवस उरला असताना सरकारची मान्यता मात्र अजूनही मिळालेली नाही

पणजी : गोव्यातील लोकप्रिय सनबर्न आणि सुपरसॉनिक या दोन संगीत महोत्सवांना प्रारंभ होण्यास केवळ एक दिवस उरला असताना सरकारची मान्यता मात्र अजूनही मिळालेली नाही, अशी माहिती देशभर गाजावाजा झालेल्या संगीत महोत्सवाच्या आयोजकांनी ‘लोकमत’ला शुक्रवारी दिली.आयोजकांनी सहा महिन्यांपूर्वी महोत्सवांच्या मान्यतेसाठी सरकारकडे अर्ज केलेले आहेत. गोवा सरकारच्या एक खिडकी योजनेत पर्यटन संचालक, पर्यटन संस्थांचे प्रतिनिधी आणि अन्य सरकारी अधिकाऱ्यांचा समावेश आहे. त्यांच्या समितीने महोत्सवस्थळाची पाहणी करून त्याचा अहवाल व अर्जाची फाईल मुख्यमंत्री लक्ष्मीकांत पार्सेकर यांच्याकडे मान्यतेसाठी पाठविली आहे. मात्र, त्याला अजूनही मान्यता मिळालेली नाही. डिसेंबरमध्ये गोव्यात अगोदरच पर्यटकांची मोठी संख्या असते. त्यातच आणखी महोत्सव घेणे चुकीचे आहे. आयोजकांनी मला भेटावे. त्यांना पुढील वर्षाच्या आयोजनासंदर्भात सूचना देऊनच मी यंदाच्या कार्यक्रमाला मान्यता देणार आहे, असे मुख्यमंत्री लक्ष्मीकांत पार्सेकर यांनी सांगितले. (विशेष प्रतिनिधी)