संसदीय पक्षनेतेपदी पुन्हा सोनिया गांधी

काँग्रेसच्या खासदारांनी शनिवारी संसदीय पक्षाच्या अध्यक्षपदी सोनिया गांधी यांची एकमताने फेरनिवड केली.

शीलेश शर्मा, नवी दिल्ली - काँग्रेसच्या खासदारांनी शनिवारी संसदीय पक्षाच्या अध्यक्षपदी सोनिया गांधी यांची एकमताने फेरनिवड केली. त्याचवेळी लोकसभा आणि राज्यसभेच्या नेत्यांच्या निवडीचे अधिकार त्यांना बहाल केले. लोकसभेत पक्षनेतेपदी कमलनाथ किंवा अमरेंद्रसिंग यांच्यापैकी एकाची निवड होण्याचे संकेत मिळाले आहेत. ए.के. अ‍ॅन्टनी किंवा गुलाम नबी आझाद यांना राज्यसभेत पक्षनेतेपद दिले जाईल. दोन्ही सभागृहांतील नेत्यांच्या नावांची घोषणा ४ जुलै आधी होण्याची शक्यता आहे. १६व्या लोकसभेचे सत्र सुरू होण्यापूर्वी डावपेच आखले जातील. ‘जशास तसे’ धोरण संसदेचे अधिवेशन सुरू होण्यापूर्वीच कॅगच्या मुद्द्यावर काँग्रेसने भाजपा सरकारची कोंडी करण्यासाठी आक्रमक रणनीती आखण्याचे काम सुरू केले आहे. गुजरात सरकारवर ताशेरे ओढणारा कॅगचा अहवाल विधानसभेत सादर होणार असून हाच मुद्दा गुजरात विधानसभेत आणि लोकसभेत काँग्रेसच्या आक्रमणाची धार वाढवणार आहे. भाजपाने संपुआ सरकारवर भ्रष्टाचाराचे आरोप करीत रान उठविले होते त्याचे कारण कॅगचा अहवालच होता. आता जशास तसे उत्तर देण्याची पाळी आली आहे, असे काँग्रेसच्या एका ज्येष्ठ नेत्याने ‘लोकमत’ला अनौपचारिक संवाद साधताना म्हटले. ‘दिल्ली मे गुजरात का चोर, चारो ओर सीएजी का शोर’ हा काँग्रेसचा नवा नारा संसदेचे दोन्ही सभागृह दणाणून सोडणार आहे. संसदीय पक्षाच्या बैठकीत मावळते पंतप्रधान डॉ. मनमोहन सिंग यांच्या कार्याची प्रशंसा करणारा प्रस्ताव पारित करण्यात आला. प्रगतीशील आणि धर्मनिरपेक्ष पक्षांनी लोकशाहीला बळकट करण्यासाठी सामूहिक डावपेच आखत मजबूत विरोधी पक्षाचे दर्शन घडवावे, असे आवाहनही या प्रस्तावात केले आहे.