राहुल गांधींचा अनादर झाला नाही!

बंगळुरूच्या प्रतिष्ठित माऊंट कार्मेल महाविद्यालयात राहुल गांधी यांची नाचक्की झाल्याचे सपशेल खोटे आहे आणि त्यांना असा अनादर झाला नाही वा उत्तरांमुळे ते खजीलही झाले नाही

बंगळुरू : बंगळुरूच्या प्रतिष्ठित माऊंट कार्मेल महाविद्यालयात राहुल गांधी यांची नाचक्की झाल्याचे सपशेल खोटे आहे आणि त्यांना असा अनादर झाला नाही वा उत्तरांमुळे ते खजीलही झाले नाही, असे या महाविद्यालयाच्याच एका विद्यार्थिनीने आपल्या फेसबुकवर पोस्ट केले आहे.या महाविद्यालयातील विद्यार्थिनी व राहुल गांधी यांच्यातील संवादाच्या वेळी राहुल गांधींना अनेक प्रश्नांची उत्तरे देताच आली नाही आणि पंतप्रधान नरेंद्र मोदींचे ‘मेक इन इंडिया व स्वच्छ भारत अभियान’ काम करीत आहे काय, या त्यांनी विचारलेल्या प्रश्नावर सर्व विद्यार्थिनींनी ‘होय’ असे उत्तर दिल्यामुळे त्यांची मोठी नाचक्की झाल्याचे वृत्त प्रसिद्ध झाल्यानंतर दुसऱ्याच दिवशी एलिक्झिर नायर या विद्यार्थिनीने हा खुलासा केला. (वृत्तसंस्था)‘राहुल गांधी विनोदी स्वभावाचे आहेत. सुरुवातीपासूनच त्यांनी श्रोत्यांची नाडी पकडली. स्वच्छ भारत व मेक इंडियावरील त्यांच्या प्रश्नांना संमिश्र उत्तरे मिळाली. परंतु त्या उत्तराचा केवळ एकच भाग (होय) प्रसिद्ध करण्यात आला, असे नायरने म्हटले आहे.