Pahalgam Terror Attack: पहलगाम हल्ल्यानंतर भारताने विविध देशात आपले प्रतिनिधी पाठवून पाकिस्तानचा दहशतवादी चेहरा जगासमोर आणण्याचे काम केले. असे असतानाही अमेरिका याच पाकिस्तानला जवळ करू पाहत आहे. यामुळेच आता अमेरिकेने पाकिस्तानी लष्करप्रमुख जनरल असीम मुनीरला १४ जून रोजी वॉशिंग्टन डीसी येथे अमेरिकन सैन्याच्या २५० व्या वर्धापन दिनानिमित्त आयोजित समारंभाचे निमंत्रण पाठवले आहे. दरम्यान, यावरुन काँग्रेस नेते जयराम रमेश यांनी केंद्रातील मोदी सरकारवर निशाणा साधला आहे.
अमेरिकेचा हेतू काय आहे?जयराम रमेश सोशल मीडिया प्लॅटफॉर्म एक्सवर केलेल्या पोस्टमध्ये म्हटले की, 'अमेरिकेच्या लष्कर दिनानिमित्त (१४ जून) वॉशिंग्टन डीसी येथे आयोजित कार्यक्रमात पाकिस्तानी लष्करप्रमुख जनरल असीम मुनीरला निमंत्रण दिले आहे. ही बातमी भारतासाठी राजनैतिक आणि सामरिकदृष्ट्या मोठा धक्का आहे. हा तोच व्यक्ती आहे, ज्याने पहलगाम दहशतवादी हल्ल्यापूर्वी प्रक्षोभक आणि भडकावणारी भाषा वापरली होती. आता प्रश्न असा पडतो की, अमेरिकेचा हेतू काय आहे? अलीकडेच, यूएस सेंट्रल कमांडच्या प्रमुखांनीही दहशतवादाविरुद्धच्या लढाईत पाकिस्तान अमेरिकेचा 'भागीदार' असल्याचे विधान केले होते."
विशेष अधिवेशन बोलावण्याची मागणी 'मोदी सरकार म्हणते की, ऑपरेशन सिंदूर अजूनही चालू आहे, अशा परिस्थितीत पाकिस्तानी लष्करप्रमुखाचे अमेरिकन लष्कर दिनाला पाहुणा म्हणून उपस्थित राहणे, ही निश्चितच गंभीर चिंतेची बाब आहे. ट्रम्प प्रशासन सतत अशी विधाने करत आहे, ज्याचा अर्थ असा काढता येईल की, अमेरिका आता भारत आणि पाकिस्तानकडे एकाच पातळीवर पाहत आहे. एकीकडे पाकिस्तानच्या दहशतवादाला पाठिंबा देण्याच्या भूमिकेबद्दल अमेरिकेसह संपूर्ण जगाला माहिती देऊन परतलेल्या शिष्टमंडळाचे पंतप्रधान स्वागत करत आहेत अन् दुसरीकडे अमेरिकेतून अशाप्रकारच्या बातम्या येत आहेत, ज्यामुळे भारताची राजनैतिक भूमिका आणखी अस्वस्थ होते.'
'पंतप्रधानांनी आता आपला हट्टीपणा आणि प्रतिष्ठेची चिंता बाजूला ठेवून सर्वपक्षीय बैठक आणि संसदेचे विशेष अधिवेशन बोलावावे, जेणेकरून देश आपली सामूहिक इच्छा स्पष्टपणे व्यक्त करू शकेल आणि देशासमोर एक ठोस रोडमॅप सादर करता येईल. दशकांची राजनैतिक प्रगती इतक्या सहजपणे कमकुवत होऊ देता येणार नाही,' अशी टीका जयराम रमेश यांनी केली आहे. यावर अद्याप भाजपकडून कुठलीही प्रतिक्रिया आली नाही.
पाकिस्तानी लष्करप्रमुख अमेरिकेला जाणारपाकिस्तानी लष्करप्रमुख असीम मुनीर अमेरिकेला भेट देणार आहे. १४ जून रोजी वॉशिंग्टन डीसी येथे अमेरिकन सैन्याच्या २५० व्या वर्धापन दिनानिमित्त आयोजित समारंभात ते सहभागी होतील. अमेरिकेचे अध्यक्ष डोनाल्ड ट्रम्प यांच्या ७९ व्या वाढदिवसानिमित्त हा कार्यक्रम आयोजित केला जाईल. भारत आणि पाकिस्तानमधील अलिकडच्या तणावानंतर असीम मुनीरचा हा पहिलाच परदेश दौरा असेल.