खळबळजनक! रात्री कलिंगड खाल्लं, सकाळी मुलाचा मृत्यू; एकाच कुटुंबातील ५ जणांची प्रकृती चिंताजनक

रात्री खाल्लेलं कलिंगड सकाळी एका कुटुंबाच्या जीवावर बेतल्याचं म्हटलं जात आहे. 

ओडिशातील केंद्रपाडा जिल्ह्यात एक धक्कादायक घटना समोर आली आहे. फूड पॉयझनिंगमुळे एका मुलाचा मृत्यू झाला आहे, तर त्याच कुटुंबातील इतर पाच जण रुग्णालयात मृत्यूशी झुंज देत आहेत. या घटनेमुळे केवळ कुटुंबच उद्ध्वस्त झालं नाही, तर संपूर्ण गावात भीतीचं वातावरण निर्माण झालं आहे. रात्री खाल्लेलं कलिंगड सकाळी एका कुटुंबाच्या जीवावर बेतल्याचं म्हटलं जात आहे. 

कलिंगड खाल्ल्यानंतर तब्येत बिघडली

मिळालेल्या माहितीनुसार, केंद्रपाडा जिल्ह्यातील पट्टामुंडई ब्लॉकच्या कुपुनी गावात गुरुवारी रात्री एका कुटुंबाने कलिंगड खाल्लं होते. हे फळ त्यांची प्रकृती इतकी गंभीर करेल, याची कोणालाही पुसटशी कल्पना नव्हती. सकाळ होताच कुटुंबातील सदस्यांनी पोटदुखीची तक्रार करण्यास सुरुवात केली आणि काही वेळातच त्यांना उलट्या आणि जुलाब सुरू झाले.

एकाच वेळी ६ जण आजारी

कुटुंबातील एकूण ६ जण अचानक गंभीर आजारी पडले. प्रकृती खालावत असल्याचं पाहून सर्वांना तातडीने केंद्रपाडा जिल्हा मुख्य रुग्णालयात दाखल करण्यात आलं. तिथे तिघांवर उपचार सुरू करण्यात आले, तर दोघांची प्रकृती अत्यंत चिंताजनक असल्याने त्यांना कटक येथे रेफर (हलवण्यात) करण्यात आलं. उपचारादरम्यान कुटुंबातील स्वाधीन सेनापती या मुलाचा मृत्यू झाला. यानंतर कुटुंबावर दुःखाचा डोंगर कोसळला आहे. 

 ना कलिंगड, ना बिर्याणी...पायधुनीतील 'त्या' चौघांच्या मृत्यूचं खरं कारण अखेर समोर!

कुटुंबाने सांगितली घडलेली घटना

कुटुंबातील चारुलता सेनापती यांनी सांगितलं की, रात्री कलिंगड खाल्ल्यानंतर सकाळी मुलं जेव्हा ट्यूशनवरून परत आली, तेव्हा त्यांची तब्येत बिघडली. त्यांना उलट्या, पोटदुखी आणि जुलाब असा त्रास सुरू झाला. त्यांनी पुढे सांगितलं की, कुटुंबातील पाच जण रुग्णालयात दाखल असून त्यांच्यापैकी काहींवर केंद्रपाडा तर काहींवर कटक येथे उपचार सुरू आहेत.

सावधान! बिर्याणीनंतर कलिंगड खाल्ल्याने खरंच मृत्यू होतो का? डॉक्टरांनीच सांगितलं 'सत्य'

डॉक्टर काय म्हणाले?

केंद्रपाडा जिल्हा रुग्णालयाचे डॉक्टर अंबिका प्रसाद नायक यांनी दिलेल्या माहितीनुसार, रुग्णालयात दाखल झालेल्या रुग्णांमध्ये उलट्या, जुलाब आणि पोटदुखीची लक्षणं आहेत. प्राथमिक तपासणीत त्यांनी हे फूड पॉयझनिंगचं प्रकरण असल्याचं सांगितलं आहे. सध्या सर्व रुग्णांवर उपचार सुरू आहेत. या घटनेनंतर आरोग्य विभाग सतर्क झाला असून, कलिंगडामध्ये काही होतं का की फूड पॉयझनिंगचं कारण काही वेगळं होतं, याचा शोध घेण्याचा प्रयत्न केला जात आहे.