न्या. शरद बोबडे आज होणार सरन्यायाधीश

महाराष्ट्राला तिसऱ्यांदा मिळेल सर्वोच्च मान

नवी दिल्ली : सर्वोच्च न्यायालयाचे सर्वात ज्येष्ठ न्यायाधीश न्या. शरद अरविंद बोबडे सोमवारी भारताचे ४७ वे सरन्यायाधीश म्हणून सूत्रे स्वीकारतील. न्या. बी. पी. गजेंद्रगडकर व न्या. यशवंत चंद्रचूड यांच्यानंतर न्यायसंस्थेतील या सर्वोच्च पदाचा मान महाराष्ट्राला तिसऱ्यांदा मिळणार आहे.

सोमवारी सकाळी राष्ट्रपती भवनात होणाºया साध्या समारंभात राष्ट्रपती रामनाथ कोविंद न्या. बोबडे यांना सरन्यायाधीशपदाची शपथ देतील. सन २०१३ मध्ये सर्वोच्च न्यायालयात नियुक्त झालेल्या न्या. बोबडे यांची सरन्यायाधीशपदाची कारकिर्द सुमारे दीड वर्षाची असेल. वयाची ६५ वर्षे पूर्ण होतील तेव्हा म्हणजे २३ एप्रिल २०२१ रोजी ते निवृत्त होतील. आधीचे सरन्यायाधीश न्या. रंजन गोगोई सुमारे १३ महिन्यांच्या कारकिर्दीची ऐतिहासिक अयोध्या निकालाने सांगता करून रविवारी सायंकाळी निवृत्त झाले. आपले उत्तराधिकारी म्हणून न्या. बोबडे यांच्या नावाची शिफारस महिनाभरापूर्वी त्यांनी केली होती. त्यानुसार ३० ऑक्टोबर रोजी राष्ट्रपतींनी न्या. बोबडे यांची १८ नोव्हेंबरपासून सरन्यायाधीश म्हणून नेमणूक केली होती.

सरन्यायाधीश शरद बोबडे यांच्या निमित्ताने तब्बल साडेतीन दशकांनंतर मराठी माणूस सर्वोच्च न्यायालयाच्या सरन्यायाधीशपदाची सूत्रे स्वीकारणार आहे. या क्षणाचे साक्षीदार होण्यासाठी महाराष्ट्रातील विधी क्षेत्र राजधानी दिल्लीत दाखल झाले आहेत.

सरन्यायाधीश शरद बोबडे यांचे कुटुंबीय, नातेवाईक व मित्र मंडळींची उपस्थिती या सोहळ््यात लक्षणीय ठरणार आहे. न्या. बोबडे मुळचे नागपूरचे असल्याने व मुंबई उच्च न्यायालयाच्या नागपूर खंडपीठात त्यांनी अनेक वर्षे प्रॅक्टीस केल्याने नागपुरातील बहुतांश मंडळी शपथविधी सोहळ््याला उपस्थित राहणार आहेत. मुंबई उच्च न्यायालयाच्या नागपूर खंडपीठाचे न्यायाधीश नितीन सांबरे, महाराष्ट्राचे माजी महाधिवक्ता श्रीहरी अणे, अतिरिक्त सॉलिसीटर जनरल अनिल सिंग यांच्यासह आदी मंडळी दिल्लीत दाखल झाली आहेत. अनेकांना न्या. बोबडे यांनी खासगी निमंत्रण पाठविले आहे.

सकाळी साडेदहा वाजता सरन्यायाधीश बोबडे आणि न्या. भूषण गवई यांच्यासमक्ष न्यायालयीन सुनावणीला सुरुवात होण्याची शक्यता आहे. त्यामुळे हा देखील एक ऐतिहासिक क्षण नागपूरकरांसाठी असणार आहे. वकील, अतिरिक्त न्यायाधीश, न्यायाधीश आणि सरन्यायाधीश या एकूण प्रवासात त्यांच्यासोबत राहीलेले अनेक मित्र, सहकारी, ज्युनियर्स, पत्रकार या निमित्ताने दिल्लीत दाखल झाले आहेत.

दिल्लीतील मराठी वकिलांमध्ये आनंद : राजधानी दिल्लीत सर्वोच्च न्यायालय व उच्च न्यायालयात वकिली करणाऱ्या मराठी माणसांमध्येही आनंदाचे वातावरण आहे. जवळपास सर्वांसाठीच मराठी सरन्यायाधीशांच्या कार्यकाळात काम करण्याची ही पहिली वेळ असणार आहे. सर्वोच्च न्यायालय, दिल्ली उच्च न्यायालय व जिल्हा न्यायालये मिळून २०० अधिक मराठी वकील मंडळी दिल्लीत कार्यरत आहेत.

न्यायाधीशांना सूचना
मुंबई उच्च न्यायालय, नागपूर व औरंगाबाद खंडपीठ येथील न्यायाधीशांना शपथविधीसाठी सुट्या घेऊन दिल्लीत येऊ नका, अशा सूचना सरन्यायाधीशांनी दिल्या आहेत. न्यायालयाच्या कामकाजावर परिणाम होऊ नये, या उद्देशाने न्या. बोबडे यांनी या सूचना दिल्याचे सूत्रांनी ‘लोकमत’ला सांगितले.