ऑनलाइन लोकमत
नवी दिल्ली, दि. 26 - नवी दिल्लीच्या रोहिणी परिसरात शनिवारी एक मन हेलावणारी घटना घडली. येथे 3 वर्षाच्या दोन जुळ्या भावांचा वॉशिंग मशीनमध्ये बुडाल्याने मृत्यू झाला. ही घटना घडली त्यावेळी मुलांची आई वॉशिंग पावडर आणण्यासाठी जवळच्या दुकानात गेली होती.
मिळालेल्या माहितीनुसार या मुलांची आई रेखा यांनी दुपारी साडे बाराच्या सुमारास कपडे धुण्यासाठी वॉशिंग मशिनमध्ये पाणी भरलं पण वॉशिंग पावडर संपल्यामुळे त्या जवळच्या दुकानात गेल्या होत्या. त्याच दरम्यान ही दुर्देवी घटना घडली. धुण्यासाठी काढलेल्या कपड्यांवर उभं राहून मशिनमध्ये डोकावताना मुलं पडली असण्याची शक्यता वर्तवण्यात येत आहे.वॉशिंग मशिनमध्ये जवळपास 15 लिटर पाणी होतं.
रेखा परत आल्यावर त्यांना मुलं दिसली नाहीत म्हणून त्यांनी पती रविंदर यांना याबाबत माहिती दिली. विमा कंपनीत काम करणारे रविंदर घरी आल्यावर दोन्ही मुलं वॉशिंग मशिनमध्ये बुडाल्याचं त्यांना दिसलं.तात्काळ त्यांना रूग्णालयात दाखल करण्यात आलं पण तेथे त्यांना मृत घोषीत केलं.
कुटुंबावर दुःखाचा डोंगर कोसळला असून सीआरपीसी कलम 174 अंतर्गत पोलीस चौकशी करत आहेत.