ऑनलाइन लोकमत
नवी दिल्ली, दि. 16 - राजधानी दिल्लीमधील महिलांच्या सुरक्षेवरील प्रश्नचिन्ह अजूनही कायम असल्याचं दिसत आहे. दोन अल्पवयीन तरुणींवर त्यांच्याच मित्रांसमोर सामूहिक बलात्कार करण्यात आल्याची धक्कादायक घटना घडली आहे. तरुणींच्या मित्रांना मारहाण करण्यात आली आणि त्यानंतर त्यांच्यासमोर तरुणींवर बलात्कार करण्यात आला. पीडित तरुणींनी दिलेल्या माहितीच्या आधारे पोलिसांनी चार आरोपींना अटक केली असून यामधील काही तरुण अल्पवयीन असण्याची शक्यता आहे.
'आम्ही आमच्या मित्रांसोबत मुंदका मेट्रो स्टेशनजळ असणा-या मैदानामधील झाडाखाली बसलो होते. तेव्हा पाच तरुण आम्ही सुरक्षारक्षक असल्याची बतावणी करत तिथे आले आणि जबरदस्ती करण्यास सुरुवात केली. जेव्हा आमच्या मित्रांनी प्रतिकार केला तेव्हा त्यांच्यामधील दोघांनी मारहाण करत त्यांना झाला बांधले. त्यानंतर आम्हाला झुडूपात खेचत नेले आणि आमच्यावर बलात्कार केला. विरोध केलात तर तुमची हत्या करेन अशी धमकीही दिली होती. बलात्कार केल्यानंतर पोलिसांमध्ये तक्रार न करण्याची धमकी देत त्यांनी सोडून दिलं. आरोपींनी आमची सुटका केल्यानंतर आमच्या मित्रांना आम्ही सोडवलं. त्यानंतर पोलिसांशी संपर्क साधला,' अशी माहिती पीडित तरुणींनी पोलिसांना दिली आहे.
'तक्रार झाल्यानंतर पीडित तरुणींना वैद्यकीय तपासणीसाठी रुग्णालयात नेण्यात आलं. आरोपी जवळच्याच झोपडपट्टीत राहणारे आहेत. स्थानिकांनी दिलेल्या माहितीनुसार त्यांनी याअगोदरही महिलांची छेड काढली आहे. पण त्यातील कोणत्याही पीडितीने तक्रार केली नाही,' असं पोलिसांनी सांगितलं आहे.
अमन विहार पोलिसांनी चार आरोपींना अटक केली आहे. चौकशी केल्यानंतर आरोपींनी गुन्हा कबूल केला आहे. आरोपींनी आपण अल्पवयीन असल्याचा दावा केला असून पोलीस तपास करत आहेत. पाचवा आरोपी फरार असून त्याच्या शोध पोलीस घेत आहेत.