राजस्थानमध्ये भीषण अपघात; स्कूल बसला ट्रकची जोरदार धडक, १० विद्यार्थी जखमी

भरधाव वेगाने येणाऱ्या एका ट्रकने खासगी स्कूल बसला पाठीमागून जोरात धडक दिली.

राजस्थानमधील बाडमेर येथे एक भीषण अपघात झाला आहे. बायतू भागात भरधाव वेगाने येणाऱ्या एका ट्रकने खासगी स्कूल बसला पाठीमागून जोरात धडक दिली. ही धडक इतकी भीषण होती की, बसमधील विद्यार्थ्यांमध्ये एकच खळबळ उडाली आणि परिसरात भीतीचं वातावरण निर्माण झालं.

मिळालेल्या माहितीनुसार, अपघात झाला तेव्हा स्कूल बस रस्त्याच्या कडेला उभी होती आणि विद्यार्थ्यांना बसमध्ये घेण्यासाठी थांबली होती. बसमध्ये २४ मुलं होती. बायतू-जोधपूर चौकाजवळ सकाळी हा अपघात घडला. धडकेमुळे बसच्या मागील भागाचे मोठ्या प्रमाणावर नुकसान झालं असून १० मुलं जखमी झाली आहेत. स्थानिक नागरिकांनी तातडीने धाव घेत बचावकार्य सुरू केले आणि जखमींना जवळच्या बायतू रुग्णालयात दाखल केलं.

९ विद्यार्थ्यांची प्रकृती चिंताजनक

जखमी झालेल्या मुलांपैकी ९ जणांची प्रकृती गंभीर असल्याने त्यांना प्राथमिक उपचारानंतर जोधपूर येथील मोठ्या रुग्णालयात हलवण्यात आलं आहे. या मुलांना फ्रॅक्चर आणि गंभीर जखमा झाल्या आहेत. तज्ज्ञ डॉक्टरांचे पथक त्यांच्यावर लक्ष ठेवून आहे.

अपघाताची माहिती मिळताच पालकांनी रुग्णालयात गर्दी केली. आपल्या मुलांची अवस्था पाहून पालकांमध्ये प्रशासनाविरुद्ध प्रचंड रोष पाहायला मिळाला. घटनेची माहिती मिळताच पोलिसांनी घटनास्थळी धाव घेत परिस्थिती नियंत्रणात आणली. स्थानिक लोकप्रतिनिधी आणि भाजपा नेते बालाराम मूंढ यांनीही रुग्णालय आणि घटनास्थळाला भेट देऊन मुलांच्या प्रकृतीची विचारपूस केली. त्यांनी प्रशासनाला जखमींना सर्वोत्तम उपचार देण्याचे निर्देश दिले आहेत.

तपासाला सुरुवात

पोलिसांनी याप्रकरणी तपास सुरू केला आहे. प्राथमिक अंदाजानुसार, ट्रकचा अतिवेग आणि चालकाचा निष्काळजीपणा हेच या अपघाताचं मुख्य कारण असल्याचं मानलं जात आहे. यासोबतच पोलीस स्कूल बसचे फिटनेस प्रमाणपत्र, परमिट आणि ड्रायव्हरच्या कागदपत्रांचीही कसून चौकशी करत आहेत.