अहमदाबादहून लंडनला जाण्यासाठी निघालेले एअर इंडियाचे विमान विमानतळ परिसरातच कोसळल्याने मृतांचा आकडा वाढण्याची शक्यता आहे. हे विमान नजिकच्या बीजे मेडिकल कॉलेजच्या हॉस्टेलवर कोसळले आहे. यामुळे हॉस्टेलमधील इंटर्न डॉक्टरांचाही मोठ्या संख्येने यात मृत्यू होण्याची शक्यता व्यक्त केली जात आहे. अशातच या विमान अपघातातील कोणाचीही वाचण्याची शक्यता वाटत नसल्याचे वक्तव्य हमदाबाद पोलिस आयुक्त जी.एस. मलिक केले आहे. परंतू, तरीही काहीजण वाचण्याची आशा पल्लवित झाली आहे.
या विमान अपघातातील मृतांची आकडेवारी समोर आलेली नाही, परंतू जखमींची यादी समोर आली आहे. या यादीनुसार २५ जण गंभीर जखमी झाले असून त्यांच्यावर वेगवेगळ्या वॉर्डमध्ये उपचार सुरु आहेत. या यादीतील बहुतांश जखमींचे वय हे १८ ते २२ वर्षे आहे. यामुळे हे सर्वजण बीजे मेडिकल कॉलेजच्या हॉस्टेलचे इंटर्न असण्याची शक्यता आहे.
अहमदाबादहून लंडनला जाणारे एअर इंडियाचे विमान दुपारी उड्डाणानंतर कोसळले. या विमानात 230 प्रवाशांसह 12 क्रु मेंबर्स प्रवास करत होते. यात गुजरातचे माजी मुख्यमंत्री विजय रुपाणी यांचाही समावेश होता. या अपघातात सर्वांचा मृत्यू झाला असल्याची शक्यता वर्तविली जात आहे.
मीडिया रिपोर्ट्सनुसार, अहमदाबाद पोलिस आयुक्त जी.एस. मलिक यांनी सांगितले की, अपघाताची तीव्रता पाहता कोणत्याही प्रवाशाची वाचण्याची शक्यता खूपच कमी आहे. विमान निवासी भागात कोसळल्याने, काही स्थानिक लोकांचाही मृत्यू झाल्याची भीती त्यांनी व्यक्त केली. तसेच, काही जखमींना उपचारासाठी रुग्णालयात आणण्यात आले आहे, परंतु त्यांची प्रकृती खूपच गंभीर असल्यामुळे, त्यांचा जीव वाचणे कठीण आहे.