०९... गुन्हे

च�

��रट्यास अटक
काटोल : स्थानिक पोलीस ठाण्याच्या हद्दीतील रिधोरा शिवारातील शेतातून शेतीपयोगी साहित्य चोरून नेणाऱ्या चोरट्यास काटोल पोलिसांनी अटक केली.
उमेश पांडुरंग वाघाडे (३०, रा. रिधोरा, ता. काटोल) असे अटक करण्यात आलेल्या चोरट्याचे नाव आहे. रिधोरा शिवारात फिर्यादी दुनेश्वर शंकर जवंजाळ (५२, रा. रिधोरा, ता. काटोल) यांची शेती आहे. उमेशने बुधवारी मध्यरात्री त्यांच्या शेतातील २४ नग पितळी नोझल चोरून नेले होते. या नोझलची किंमत ९ हजार ६०० रुपये असल्याचे पोलिसांनी सांगितले. या प्रकरणी काटोल पोलिसांनी भादंवि ३७९ अन्वये गुन्हा नोंदवून आरोपीस अटक केली.
***
खापरखेड्याच्या पशुवैद्यकीय दवाखान्यात चोरी
खापरखेडा : स्थानिक पशुवैद्यकीय दवाखान्यात चोरट्यांनी हात साफ करीत १९ हजार ७०० रुपये किमतीचा मुद्देमाल लंपास केला. ही घटना शनिवारी मध्यरात्री घडली.
अज्ञात चोरट्यांनी खापरखेडा येथील पशुवैद्यकीय दवाखान्याच्या दाराचे कुलूप तोडून आत प्रवेश केला. त्यात चोरट्यांनी दवाखान्यातील कॅमेरा, कूलर, स्टोव्हसह इतर साहित्य चोरून नेले. या साहित्याची किंमत १९ हजार ७०० रुपये असल्याचे पोलिसांनी सांगितले. या प्रकरणी खापरखेडा पोलिसांनी भादंवि ४५७, ३८० अन्वये गुन्हा नोंदविला असून, सदर घटनेचा तपास सहायक फौजदार रामअसारे मिश्रा करीत आहे.
***
शेतीपयोगी साहित्य लंपास
नरखेड : शेतातील शेतीपयोगी साहित्य चोरट्यांनी लंपास केल्याची घटना जलालखेडा पोलीस ठाण्याच्या हद्दीतील भिष्णूर शिवारात रविवारी मध्यरात्री घडली.
फिर्यादी नत्थू तुळशीराम गेडाम (५५, रा. भिष्णूर, ता. नरखेड) यांची भिष्णूर शिवारात शेती आहे. चोरट्यांनी त्यांच्या शेतातील मोटरपंप, स्टार्टर व पाईप असा एकूण १४ हजार ५०० किंमतीचा ऐवज चोरून नेला. या प्रकरणी जलालखेडा पोलिसांनी भादंवि ३७९ अन्वये गुन्हा नोंदवून तपास सुरू केला आहे.
***