२८... गुन्हे

ट्रकच्या धडकेत तरुणाचा मृत्यू
नागपूर : भरधाव ट्रकने विरुद्ध दिशेने येणाऱ्या मोटरसायकलला धडक दिली. यात गंभीर जखमी झालेल्या तरुणाचा घटनास्थळीच मृत्यू झाला. ही घटना बुटीबोरी एमआयडीसी परिसरात शनिवारी सायंकाळी ४.४५ वाजताच्या सुमारास घडली.
मनोज अभिमान चांदणे (२८, रा. गोरेगाव) असे मृत तरुणाचे नाव आहे. मनोज एमएच-४०/एएन-१३३० क्रमांकाच्या मोटरसायकलने जात असताना विरुद्ध दिशेने भरधाव येणाऱ्या ट्रकने त्याच्या मोटरसायकलला धडक दिली. यात गंभीर दुखापत झाल्याने मनोजचा घटनास्थळीच मृत्यू झाला. या प्रकरणी बुटीबोरी पोलिसांनी ट्रकचालकाविरुद्ध भादंवि २७९, ३३७, ३०४ (अ) अन्वये गुन्हा नोंदवून तपास सुरू केला आहे.
***
विष प्राशन करून आत्महत्या
नागपूर : तरुणाने विष प्राशन करून आत्महत्या केल्याची घटना केळवद पोलीस ठाण्याच्या हद्दीतील ढालगाव (खैरी) येथे रविवारी रात्री ९ वाजताच्या सुमारास घडली.
किशोर धनराज ताजने (२१, रा. ढालगाव खैरी, ता. सावनेर) असे मृत तरुणाचे नाव आहे. किशोरने रविवारी रात्री विषारी औषध प्राशन केले. ही बाब लक्षात येताच घरच्या मंडळींनी त्याला नागपूर येथील मेडिकल हॉस्पिटलमध्ये भरती केले. तिथे उपचारादरम्यान त्याचा मृत्यू झाला. या प्रकरणी केळवद पोलिसांनी अकस्मात मृत्यूची नोंद करून तपास सुरू केला आहे.
***