१३... गुन्हे

भरधाव ट्रकची दुचाकीला धडक
तरुण जखमी : रहाडी शिवारातील अपघात
मौदा : भरधाव ट्रकने विरुद्ध दिशेने येणाऱ्या मोटरसायकलला जोरदार धडक दिली. यात मोटरसायकलस्वार तरुण गंभीर जखमी झाला. ही घटना मौदा पोलीस ठाण्याच्या हद्दीतील रहाडी शिवारात बुधवारी रात्री ११.३० वाजताच्या सुमारास घडली.
शेखर राजू अंबोने (३०, रा. ब्राम्ह्यणी) असे जखमी तरुणाचे नाव आहे. शेखर हा एमएच-४०/एसआर-४१२१ क्रमांकाच्या मोटरसायकलने जात होता. दरम्यान, रहाडी शिवारात विरुद्ध दिशेने भरधाव येणाऱ्या सीजी-०७/एबी-८१६५ क्रमांकाच्या ट्रकने त्याच्या मोटरसायकलला धडक दिली. त्यात शेखरला गंभीर दुखापत झाली. या प्रकरणी मौदा पोलिसांनी भादंवि २७९, ३३७, ३३८ अन्वये गुन्हा नोंदवून ट्रकचालक मुकेश सायबू गाडसे (२८, रा. हातीशपुरा, मध्य प्रदेश) यास अटक केली. सदर घटनेचा पुढील तपास मौदा पेालीस करीत आहे.
***
चोरट्यास अटक
पारशिवनी : तालुक्यातील कन्हान पोलिसांनी कन्हान खदान चोरी प्रकरणात चोरट्यास अटक केली. त्याने मशीनचे सुटे भाग चोरून नेले होते, अशी माहिती पेालिसांनी दिली.
श्रीराम श्यामलाल तांडेकर (५०, रा. वाघोली, ता. पारशिवनी) असे अटक करण्यात आलेल्या आरोपीचे नाव आहे. कन्हान येथील वेकोलिच्या खदान क्रमांक - ३ च्या आवारात काही मशीन ठेवल्या आहेत. दरम्यान, श्रीरामने त्या मशीनचे काही सुटे भाग चोरून नेले होते. त्या सुट्या भागांची किंमत १२ हजार रुपये असल्याचे पेालिसांनी सांगितले या प्रकरणी कन्हान पोलिसांनी भादंवि ३७९ अन्वये गुन्हा नोंदवून तपास सुरू केला होता. दरम्यान, आरोपी श्रीरामला गुरुवारी मध्यरात्री अटक करण्यात आल्याचे पोलिसांनी स्पष्ट केले.
***
कामठी शहरातून दुचाकी पळविली
कामठी : शहरातील खलासीलाईन भागातून चोरट्यांनी मोटरसायकल चोरून नेल्याची घटना गुरुवारी मध्यरात्री घडली.
फिर्यादी राधेश्याम मूलचंद खत्री (५२, रा. कामठी) यांनी त्यांच्या मालकीची एमएच-३१/बीजी-८३७७ क्रमांकाची मोटरसायकल खलासीलाईन भागात उभी ठेवली होती. दरम्यान, चोरट्यांनी ती चोरून नेली. या मोटरसायकलची किंमत १० हजार रुपये असल्याचे पोलिसांनी सांगितले. या प्रकरणी कामठी पोलिसांनी भादंवि ३७९ अन्वये गुन्हा नोंदवून तपास सुरू केला आहे.
***