कोरोना लसीचा मागणीपेक्षा पुरवठा कमी

सिन्नर : कोरोना लसीचा प्रभाव लक्षात आल्यानंतर आणि आरोग्य विभागाकडून प्रबोधनानंतर नागरिक लसीकरणासाठी लसीकरण केंद्रावर गर्दी करीत आहेत. मात्र मागणीच्या तुलनेत केवळ २५ टक्केच लसीचा पुरवठा होत असल्याचे लसीकरणात अडचणी निर्माण होत आहे. सिन्नरला दर आठवड्याला किमान दहा हजार लसीची गरज असताना केवळ दोन ते अडीच हजार डोस उपलब्ध होत असल्याची माहिती आरोग्य विभागाने दिली. अपुऱ्या पुरवठ्यामुळे प्रशासनासमोर अडचण निर्माण होत आहे. कोरोनावर मात करण्यासाठी लसीकरण हाच प्रभावी उपाय असल्याचे वैद्यकीय क्षेत्रातील तज्ज्ञांकडून सांगितले जात असल्याने प्रारंभी लसीकरणापासून चार हात दूर राहणारे नागरिक आता स्वतःहून कोरोना लस घेण्यासाठी पुढे येत आहेत. त्यामुळे मागणीच्या तुलनेत पुरवठा कमी होत असल्याने अनेकदा लसीकरण बंद पडत आहेत. सिन्नर शहरातील ग्रामीण रुग्णालयात २, शिवाजीनगर येथे १ आणि नगरपालिका दवाखान्यात १ असे चार ठिकाणी लसीकरण केंद्र सुरू करण्यात आले आहेत. तर ग्रामीण भागात सहा प्राथमिक आरोग्य केंद्र, १२ आरोग्य उपकेंद्र अशा एकूण २२ केंद्रांवर कोरोनाचे लसीकरण सुरू आहे. दहा हजार लसींची गरज असताना केवळ दोन ते अडीच हजार डोस उपलब्ध होत आहे.