Nashik Mhada Land fraud: गरिबांसाठी म्हाडाला घरे किंवा जमीन न देता फसवणूक केल्याप्रकरणी ज्या भूमी अभिलेख विभागाने शहरातील सुमारे दोनशे विकासकांवर फसवणुकीची तक्रार पोलिसांत केली, त्यातील पाच जणांचे दावे मान्य करत त्यांना परस्पर क्लीन चिटही दिली आहे. त्यामुळे शासकीय यंत्रणांचा आणखी एक सावळागोंधळ उघड झाला आहे. विशेष म्हणजे या पत्राच्या आधारे गुन्हा रद्द करण्यासाठी काहींनी न्यायालयात धाव घेतल्याचे वृत्त आहे.
एक एकरपेक्षा कमी क्षेत्र करण्यासाठी ४९ विकासकांनी आकारफोड केली आणि नकाशे तयार केले, तसेच पोटहिस्सा बारा तयार करून हे दस्तावेज महसूल विभागाला सादर केले; परंतु हे नकाशे आणि सह्या मुळातच बोगस असल्याचे भूमी अभिलेख विभागाचे म्हणणे आहे. एक एकरपेक्षा कमी भूखंड व्हावेत यासाठी तुकडे करणाऱ्या या विकासकांवर पोलिसांनी गुन्हे दाखल केले असून, अनेकांची धावपळ सुरू आहे.
यातील एकाला अटक झाली असून, उर्वरित सर्वच जण अटकपूर्व जामिनासाठी धावपळ करीत आहेत. मात्र, काही विकासकांच्या म्हणण्यानुसार त्यांच्यावर चुकीच्या पध्दतीने गुन्हे दाखल करण्यात आले आहेत. कारण आपले क्षेत्र मुळातच एक एकरपेक्षा कमी आहे, आणि दुसरी गोष्ट म्हणजे सिटी सर्व्हे विभागाकडून मोजणी करून घेतल्याचा दावा केला आहे.
अशातील पाच विकासकांनी भूमी अभिलेख विभागाकडे अर्ज केले आणि आपले क्षेत्र कमी असल्याचा दावा केला. विशेष म्हणजे, भूमी अभिलेख विभागाच्या उपअधीक्षकांनीच संबंधितांचे अर्ज बघून खुलाशानंतर त्यांचे अर्ज निकाली काढत असल्याचे नमूद केले आहे.
एकीकडे या ४९ विकासकांच्या आधारे त्यांचे भागीदार आणि जमीन मालक तसेच सर्व वाटेकरी अशा १९४ जणांवर गुन्हे दाखल केले. त्यानंतर महसूलने जमिनीच्या मूळ मालकांसह सुमारे साडेतीनशे जणांना फेरफार रद्द करण्याच्या नोटिसा काढल्या आहेत. आणि आता भूमी अभिलेखने तपासणी आधीच काहींना क्लीन चिटही दिली.
गणेश गिते यांची तक्रार निकाली
भूमी अभिलेख उपअधीक्षकांनी ज्यांचे अर्ज निकाली काढले त्यात भाजपचे नेते गणेश गिते यांचा समावेश आहे. गंगापूररोडवरील सर्व्हे नंबर ७०/१ संदर्भात गिते यांच्या विरोधात पोलिसांत तक्रार दाखल आहे.
आता त्यांनी सादर केलेल्या कागदपत्रांच्या हिस्सा ४ आणि १२ चे अवलोकन केले असता संबंधित सर्व्हे नंबरवर १ ते ५ हिस्से करण्यात आले असून, त्यात गणेश गिते यांचे नाव दिसत नाही. त्यामुळे त्यांनी सादर केलेल्या कागदपत्राच्या आधारे त्यांचा अर्ज निकाली काढण्यात येत असल्याचे नमूद करण्यात आले आहे. दुसरीकडे राजकीय दबावापोटी या प्रकरणात मुद्दामहून नाव टाकण्यात आल्याचा आरोप गिते यांनी केला आहे.
पोलिसांचा आक्षेप ?
एकीकडे तक्रारकर्ता भूमी अभिलेख विभागाने अचानक क्लीन चिट देण्याचा सपाटा सुरू केला असताना दुसरीकडे मात्र पोलिसांनी त्यास आक्षेप घेतल्याचे वृत्त आहे.
Web Summary : Nashik land records, after filing a fraud complaint against developers regarding MHADA land, bizarrely issued clean chits to five builders. BJP leader Ganesh Gite received one. Police object to the clean chits issued.
Web Summary : नासिक भूमि रिकॉर्ड ने MHADA भूमि के संबंध में डेवलपर्स के खिलाफ धोखाधड़ी की शिकायत दर्ज करने के बाद, विचित्र रूप से पांच बिल्डरों को क्लीन चिट जारी कर दी। भाजपा नेता गणेश गीते को एक मिला। पुलिस ने क्लीन चिट जारी करने पर आपत्ति जताई है।