पेठ : तालुक्यातील कडवईपाडा या दुर्गम भागातील सुविधांपासून वंचित असलेल्या ५० लोककलावंतांना किराणा व सुरक्षा साहित्य वाटप करण्यात आल्याने त्यांचा आनंद द्विगुणित झाला. या भागातील जुन्या जाणत्या परंपरागत लोककला जोपासणाऱ्या कलावंतांना कोरोना काळात रोजगार नव्हता, तसेच मोठ्या प्रतिकूल स्थितीत हे लोककलावंत आपले जीवन जगत होते. त्यांना या अडचणीत साहाय्य व्हावे, यासाठी कोरोनाच्या नियमांचे पालन करून हा उपक्रम घेण्यात आल्याचे माया खोडवे यांनी सांगितले. दुर्गम नाशिक, त्रंबकेश्वर, पेठ तालुक्यातील आदिवासी पट्ट्यात हजारो लोककलावंत आहेत. त्यांचे सण, उत्सव, विवाहात, मिरवणुकीत असणारे सांस्कृतिक कार्यक्रम कोरोना काळात पूर्ण बंद आहेत. यात कलगी - तुरा, पावरी वादक, मृदुंग, तबला, ढोल, पेटी, वाद्य वादक, नाच्या, झिलक्या, कणातीकार, गावठी तमाशा, बोहाडे अशा धार्मिक,
अध्यात्मिक,
सामाजिक स्तरावर
लोककलेचा वारसा चालवणारे हजारो लोककलावंत आहेत. शासनाचे मानधन मिळत नाही. त्यात कुठले कामही या काळात मिळत नसल्याने या लोककला अस्ताला चालल्या आहेत. या कला आजच्या इंटरनेट युगात टिकवल्या पाहिजे म्हणून दुर्गम भागातील कलावंतांना मिळणारी मदत म्हणजे या कलावंतांचा उत्साह द्विगुणित करणारी आहे, असे या भागातील कलावंत हभप जगदीश महाराज जाधव यांनी सांगितले. याप्रसंगी लोककलावंतांनी आपल्या लोककला सादर केल्या. यावेळी उपस्थित कलावंतांना किराणा साहित्यासह, हात धुण्यासाठी साबण, मास्कही देण्यात आले.
यावेळी आनंद पगारे, राम खुर्दळ, विष्णू खैरनार, जगदीश महाराज जाधव यांसह लोककलावंत यावेळी उपस्थित होते. याकामी प्रवीण कोरडे यांचीही साथ लाभली.
----------------
ग्रामीण भागात विशेषतः आदिवासी दुर्गम भागात परंपरागत लोककलेचा वारसा जोपासणारे अनेक कलावंत आहेत. त्यांच्यापर्यंत कोणी पोहोचत नाही. त्यांच्या त्यागाची जाणीव म्हणून लोककलावंतांना किराणा वाटप केला. याआधीही दुर्गम भागातील महिला, विधवा महिलांच्या कुटुंबाना असे किराणा साहित्याचे वाटप केले होते. लुप्त होत चाललेल्या मराठी लोककला जपणे प्रत्येकाचे कर्तव्य आहे, त्यासाठी हा अल्प प्रयत्न.
- आनंद पगारे, नाशिक
----------------------
कडवईपाडा, ता. पेठ येथील दुर्गम भागातील लोककलावंतांना किराणा साहित्य, मास्क, साबण वाटप करतांना समुदाय पत्रकार माया खोडवे, आनंद पगारे, राम खुर्दळ आदी. (१५ पेठ २)
150721\595915nsk_2_15072021_13.jpg
१५ पेठ २