----
पानटपरी फाेडून ५४ हजाराची सिगारेट लंपास
नाशिक : भद्रकाली फळबाजारात असलेल्या लक्ष्मी पानटपरी आणि जनरल स्टोअर्स या दुकानाचे शटर उचकटून चोरट्याने ५४ हजार ५२० रुपयाची सिगारेटची पाकिटे लंपास केली आहेत. याप्रकरणी महाबला अन्नु देवाडिगा (५०, रा. नागचौक, पंचवटी) यांनी भद्रकाली पोलीस ठाण्यात घरफोडीची फिर्याद दाखल केली आहे. चोरट्याने ८ ते ९ फेब्रुवारीदरम्यान घरफोडी करून सिगारेटची पाकिटे लंपास केली आहेत. याप्रकरणी भद्रकाली पोलीस ठाण्यात गुन्हा दाखल करण्यात आला आहे.
----
रिक्षा उलटल्याने चालक ठार
नाशिक : रिक्षा उलटल्याने झालेल्या अपघातात एकाचा उपचारादरम्यान मृत्यू झाला. योगेश पोपट पवार (३४, रा. सावकी, ता. देवळा) असे अपघातात ठार झालेल्या व्यक्तीचे नाव आहे. पवार हे सावकीवरून सटाण्याच्या दिशेने जात असताना त्यांची रिक्षा उलटली. त्यात गंभीर जखमी झाल्याने त्यांच्यावर शहरातील एका खासगी रुग्णालयात उपचार सुरू होते, मात्र त्यांचा उपचारादरम्यान मृत्यू झाला.
----
पारिजातनगरला युवकाची आत्महत्या
नाशिक : पारिजातनगर येथील वनविहार कॉलनीत राहणाऱ्या एका युवकाने राहत्या घरात विषारी औषध सेवन करून आत्महत्या केली. विक्रम यशवंत शिंदे (२५) असे आत्महत्या केलेल्या युवकाचे नाव आहे. याप्रकरणी गंगापूर पोलीस ठाण्यात अकस्मात मृत्यूची नोंद करण्यात आली आहे.
----
भाजलेल्या युवकाचा मृत्यू
नाशिक : शॉर्टसर्किट होऊन लागलेल्या आगीत भाजलेल्या युवकाचा मृत्यू झाल्याची घटना सातपूर येथील पपया नर्सरीजवळ घडली. यामध्ये भगवान तुकाराम बेंडकोळी (३५, रा. पपया नर्सरी) यांचा मृत्यू झाला आहे. शॉर्टसर्किट होऊन भगवान बेंडकोळी हे १ जानेवारी रोजी गंभीररीत्या भाजले. त्यांच्यावर उपचार सुरू असताना त्यांचा मृत्यू झाला. याप्रकरणी सातपूर पोलीस ठाण्यात अकस्मात मृत्यूची नोंद करण्यात आली आहे.