रंगी रंगला दत्त पालखी सोहळा

 कसबे सुकेणे : रंगाची उधळण, भक्तीचा जल्लोष आणि भाविकांची मांदियाळी अशा भक्तिमय वातावरणात रंगपंचमीनिमित्त महानुभाव पंथीयांचे प्रमुख तीर्थस्थळ मौजे सुकेणे येथील दत्त पालखी सोहळा उत्तरोत्तर रंगला. यात्रेच्या पहिल्याच दिवशी जिल्ह्यासह राज्यभरातील सुमारे दीड लाख भाविकांनी दर्शनाचा लाभ घेतला. रंगांची यात्रा म्हणून सर्वदूर परिचित असलेला व राज्यातील लाखो महानुभाव पंथीयांचे श्रद्धास्थान असलेल्या मौजे सुकेणे येथील दत्त यात्रोत्सवास रंगपंचमीपासून प्रारंभ झाला. मिरवणुकीत पालखी पुढे उधळण्यात येणारा रंग भाविक प्रसाद म्हणून अंगावर घेतात. पालखी सोहळ्यात भाग घेण्यासाठी व नवसपूर्तीसाठी राज्यभरातून भाविक मौजे सुकेणे येथे दाखल होतात. यंदाही हा सोहळा मोठ्या उत्साहात पार पडला. रंगपंचमीला दुपारी साडेतीन वाजता मंदिराच्या पूर्व महाप्रवेशद्वारातून अखिल भारतीय महानुभाव परिषदेचे उपाध्यक्ष मनोहरशास्त्री सुकेणेकर, अर्जुनराज सुकेणेकर, बाळकृष्णराज सुकेणेकर, राजधरराज सुकेणेकर,गोपीराजशास्त्री सुकेणेकर, दत्तराज सुकेणेकर यांनी महंत सुकेणेकर बाबा यांच्या उपस्थितीत देवास विडा अवसर देऊन वंदन केले. मौजे सुकेणेच्या प्रथम नागरिक सरपंच सुरेखा गडाख, उपसरपंच नंदकुमार हांडोरे, पंचायत समितीचे सभापती पंडित अहेर, रत्ना संगमनेरे, पोलीस निरीक्षक श्रीहरी बहिरट, विलास गडाख, रावसाहेब भंडारे, डी. बी. मोगल, अशोक निकम यांच्या हस्ते पालखीचे पूजन करण्यात येऊन मिरवणुकीस प्रारंभ झाला. यावेळी डॉ. किरण देशमुख, माधवराव मोगल, रामभाऊ मोगल, सुधाकर भंडारे, विराज भंडारे, शंकर काळे, नानासाहेब भंडारे, कडू पाटील, उत्तम भंडारे, गोपीराजशास्त्री सुकेणेकर, शांतीलाल जैन, जिल्हा महानुभाव समितीचे वामन आवारे दौलत मोरे आदि उपस्थित होते. दत्तमंदिराच्या वतीने मनोहरशास्त्री सुकेणेकर, अर्जुनराज सुकेणेकर, बाळकृष्णराज सुकेणेकर यांनी पाहुण्यांचे स्वागत करून सत्कार केला. दुपारी ४ वाजता पालखी मिरवणुकीस प्रारंभ झाला. तत्पूर्वी मविप्रच्या सरचिटणीस नीलिमा पवार, माजी आमदार मंदाकिनी कदम यांनी देवदर्शन घेऊन श्री मूर्तीस विडा वाहिला. दरवर्षीप्रमाणे लाखो भाविक, भक्तीचा जल्लोष आणि रंगांची उधळण , डीजेवर तालावर थिरकणारी तरु णाई असा उत्साह सुकेणेत पहावयास मिळाला. रात्री उशिरा पालखीचे पुरातन विसावा पारावर आगमन झाले. शनिवारी पहाटे ३ वाजता सनईच्या स्वरात पालखी पुन्हा परतीच्या मार्गाला लागली. पहाटे साडेपाच वाजता पालखीचे मंदिरात आगमन झाले. रंगपंचमी खेळण्याची शेकडो वर्षांची परंपरा लाभलेल्या मौजे सुकेणेची यात्रा रंगांची यात्रा म्हणून प्रसिद्ध आहे. यंदा नोटाबंदीचा फटका राज्यातील काही यात्रोत्सवांवर बसला. मात्र सुकेणेच्या यात्रोत्सवात तो जाणवला नाही. भाविकांचा ओघ सुरू असल्याने सर्व खाद्यपदार्थांसह इतर वस्तूची विक्र ी चांगली झाली़ अशी माहिती यात्रेत श्रीरामपूरहून खेळणी विक्र ीसाठी आलेले विक्रेते सुरेश पवार यांनी दिली. यात्रेत मोठमोठे रहाट पाळणे दाखल झाले आहे. यात्रेकरूंचा चांगला प्रतिसाद लाभत असल्याचे चित्र आहे़ (वार्ताहर)