कंत्राटी कर्मचाऱ्यांची ‘धुळवड’ कायम दहाव्या दिवशीही आंदोलन सुरूच

कंत्राटी कर्मचाऱ्यांची ‘धुळवड’ कायम दहाव्या दिवशीही आंदोलन सुरूच

  नाशिक : आदिवासी विकास विभागासमोर उपोषणास बसलेल्या कंत्राटी कर्मचाऱ्यांनी काल (दि.६) दहाव्या दिवशीही उपोषण सुरूच ठेवले. विशेष म्हणजे गुरुवारीच महाराष्ट्र राज्य तासिका / मानधन शिक्षक स्त्री अधीक्षिका वर्ग-४ कर्मचारी संघटनेच्या पदाधिकाऱ्यांनी जिल्'ासह राज्यातील आमदारांना त्यांच्या मागण्यांबाबत पत्र देऊन येत्या अधिवेशनात हा प्रश्न मांडण्याची मागणी केली आहे. गेल्या नऊ दिवसांपासून या कंत्राटी कर्मचाऱ्यांनी आदिवासी विकास विभागासमोर बेमुदत आंदोलन सुरू केले आहे. आदिवासी विकास विभागाने आंदोलनकर्त्यांना आदिवासी विकासमंत्री विष्णू सावरा यांच्याशी झालेल्या चर्चेनुसार लेखीपत्र दिले. मात्र त्या पत्रात काहीही ठोस निर्णय नसल्याने आंदोलनकर्त्यांनी पत्र स्वीकारण्यास नकार दिला. तसेच नवव्या दिवशीही रात्री उशिरापर्यंत आंदोलन कायम ठेवले होते. आंदोलनकर्त्यांनी गुरुवारी गांधीगिरी करीत त्यांच्या आंदोलनाकडे लक्ष्य वेधण्यासाठी राज्यभरातील काही आदिवासी आमदारांना पत्र पाठवून त्यांना येत्या सोमवार (दि.९) पासूनच्या विधानसभेच्या अधिवेशनात हा मुद्दा उपस्थित करण्याची विनंती केली होती. आमदार नरहरी झिरवाळ, आमदार प्रकाशअष्टेकर, आमदार अमोल महाडीक, आमदार राजेश क्षीरसागर, आमदार उदयसिंग पाडवी, आमदार दीपिका चव्हाण, सहकारमंत्री चंद्रकांत पाटील आदिंना पत्र पाठवून आंदोलनाकडे लक्ष वेधण्याची विनंती केली होती. काल शुक्रवारी शासकीय सुट्टी असल्याने आंदोलनकर्त्यांकडे कोेणी ढुंकूनही पाहिले नाही. आंदोलनकर्त्यांनीही शासकीय सुट्टीचा उपयोग कपडे धुण्यासह उपोषणासाठी लागणारे साहित्य गोळा करण्यासाठी केला. (प्रतिनिधी)