लसीकरणाची पाहणी करण्यासाठी मुख्यमंत्री उद्धव ठाकरे शुक्रवारी मोलगी व धडगाव येथे आले होते. सुरुवातीला त्यांनी मोलगी ग्रामीण रुग्णालयात लसीकरणाची पाहणी केली. तेथील नागरिकांशी संवाद साधला. त्यानंतर धडगाव येथील ग्रामीण रुग्णालयाची पाहणी करून तेथेच अधिकाऱ्यांची आढावा बैठक घेतली. या वेळी आदिवासी विकासमंत्री ॲड. के. सी. पाडवी, कृषिमंत्री दादा भुसे, राज्याचे मुख्य सचिव सीताराम कुंटे, आरोग्य विभागाचे प्रधान सचिव प्रदीप व्यास, विभागीय आयुक्त राधाकृष्ण गमे, जिल्हा परिषदेच्या अध्यक्षा ॲड. सीमा वळवी, आमदार मंजुळा गावीत, विशेष पोलीस महानिरीक्षक प्रताप दिघावकर, जिल्हाधिकारी डॉ. राजेंद्र भारुड, मुख्य कार्यकारी अधिकारी रघुनाथ गावडे, पोलीस अधीक्षक महेंद्र पंडित आदी उपस्थित होते.
या वेळी मुख्यमंत्री ठाकरे यांनी सांगितले की, शहरी भागात आरोग्याच्या सुविधा उपलब्ध असतात. मात्र ग्रामीण, दुर्गम-अतिदुर्गम भागातही चांगल्या सुविधा देण्यासाठी प्रयत्न झाला पाहिजे. सध्या कोविडचा धोका वाढल्याने लसीकरणासंदर्भात नागरिकांच्या मनातील शंका दूर करून लसीकरणाचा वेग वाढविला पाहिजे. राज्यात कोरोनाचे रुग्ण मोठ्या संख्येने वाढत असल्याने अजूनही लोकांनी काळजी घ्यावी, नियम पाळावेत ही आपली कळकळीची विनंती आहे. अन्यथा पुन्हा लॉकडाऊन करावा लागेल, असा इशाराही त्यांनी या वेळी दिला. राज्यात नव्या स्ट्रेनचे रुग्ण नसल्याचे सांगून ते म्हणाले, यासंदर्भात सगळीकडे तपासणी करण्यात आली असून अजून तरी नवा स्ट्रेन आढळून आलेला नाही.
दरम्यान, मुख्यमंत्री ठाकरे यांनी लसीकरण घेण्यासाठी आलेल्या नागरिकांशी संवाद साधून, ‘मी लस घेतली आहे, पूर्णपणे सुरक्षित आहे, घाबरू नका, लस घ्या...’ या शब्दात संवाद साधला. तसेच ज्यांनी लस घेतली अशा नागरिकांशीही संवाद साधून त्यांचे अनुभव जाणून घेतले.