नंदुरबार : रेल्वे स्थानकावर होणारी गर्दी कमी व्हावी, यासाठी रेल्वेने प्लॅटफाॅर्मचे दर वाढविले आहेत. कोरोनामुळे घेण्यात आलेल्या निर्णयामुळे रेल्वे स्थानकावरची गर्दी आटोक्यात आली आहे. कोरोनाच्या भीतीनेही अनेक जण स्थानकात जाण्यास कचरत असल्याचे दिसून आले आहे.
उधना ते जळगाव रेल्वे मार्गावरच्या प्रमुख स्थानकांपैकी एक नंदुरबार आहे. गुजरात राज्याकडे जाण्यासाठी सोयीचा मार्ग असल्याने दर दिवशी शेकडोंच्या संख्येने प्रवासी मार्गक्रमण करतात. गेल्या कोरोना संक्रमणानंतर मात्र या संख्येवर परिणाम झाला होता. जून, २०२० पासून रेल्वेसेवा सुरू झाल्यानंतर प्रवासी गाड्यांमध्ये प्रवास करण्यासाठी अनेक निर्बंध असल्याने गर्दीवर नियंत्रण होते. यातून गेल्या काही महिन्यांत पुन्हा गर्दी वाढत असल्याने, रेल्वे प्लॅटफाॅर्म तिकीट हे ५० रुपये करून दिले आहे. हे तिकीट खरेदी करणे खर्चिक असल्याने अनेक जण नातेवाइकांना बाहेरच सोडून जात असल्याचे दिसून आले आहे. पूर्वी नातलगांना सोडण्यासाठी संपूर्ण कुटुंब येत होते. आता एखाद-दुसरी व्यक्ती थांबून नातेवाइकांना मार्गी लावत असल्याचे दिसून आले आहे. कोरोनाचा संसर्ग होऊ नये, यासाठी अनेक जण घरीच राहणे पसंत करत असल्याने ही स्थिती आहे. दरम्यान, जिल्हा आरोग्य विभागाचे दोन कर्मचारी येथे येणाऱ्या-जाणाऱ्यांची तपासणी करतात.
ही सेवा २४ तास सुरू आहे. हे कर्मचारी तपासणी करतील, या भीतीनेही अनेक जण रेल्वे स्टेशनच्या आतमध्ये येत नसल्याचे दिसून आले आहे.
दररोज सात तर सप्ताहात धावतात ४० रेल्वेगाड्या
नंदुरबार रेल्वे स्थानकातून दिवसाला सात गाड्या नियमितपणे धावतात, तर ४० गाड्या या साप्ताहिक धावतात. या सर्व गाड्यांना नंदुरबार येथे थांबा आहे. यातून येणाऱ्या प्रवाशांची स्थानकात तपासणी केली जाते.
दररोज ६०० पेक्षा अधिक प्रवाशांची होते नोंदणी
नंदुरबार येथून देशभरात जाणाऱ्या प्रत्येक प्रवाशाला नोंदणी करून सीट आरक्षित करणे सक्तीचे करण्यात आले आहे. यातून दरदिवशी ऑनलाइन ऑफलाइन पद्धतीने ६०० प्रवाशांची नोंदणी होत असल्याचे सांगण्यात आले आहे.
१०० पेक्षा कमी प्लॅटफाॅर्म तिकिटांची होतेय विक्री
एकीकडे प्रवाशांची नोंदणी होत असताना, १०० पेक्षा अधिकचे प्लॅटफाॅर्म तिकीट घेतले जात नसल्याची माहिती देण्यात आली आहे. तिकिटाचे दर अधिक असल्याने त्यांची खरेदी होत नसल्याची माहिती रेल्वेकडून देण्यात आली आहे.
नातेवाइकांना सोडण्यासाठी रेल्वे स्थानकावर आलो होतो. प्लॅटफाॅर्म तिकीट काढून घेतले आहे. वेळोवेळी येथे यावे लागते. रेल्वे प्रवासासाठी सोईस्कर माध्यम आहे. कोरोनामुळे गर्दी कमी आहे.
- प्रशांत पाटील, नंदुरबार
रेल्वे स्थानकात आल्यानंतर प्लॅटफाॅर्म तिकीट ५० रुपयांना असल्याची माहिती मिळाली. नातेवाइकांना सोडण्यासाठी आलो आहे. गाडीला उशीर असल्याने तिकीट खरेदी करून फलाटावर आलो आहे.
- योगेश चाैधरी, नंदुरबार
वरिष्ठांकडून आलेल्या आदेशानुसार कामकाज सुरू आहे. कोरोनामुळे रेल्वे स्थानकात होणारी गर्दी मर्यादित झाली आहे. आरोग्य तपासणी, मास्कचा वापर केल्याशिवाय कोणालाही प्रवेश दिला जात नाही. प्रवाशांना सूचना करतो.
- सुभाष मंडल, स्टेशन मास्टर, नंदुरबार