नंदुरबार जिल्ह्यात काँग्रेस लोकांमध्ये जाणार

मोदी सरकारचे तीन वर्ष : चंद्रकांत रघुवंशी यांची माहिती

ऑनलाईन लोकमत

नंदुरबार,दि.30- पंतप्रधान नरेंद्र मोदी यांच्या सरकारने तीन वर्षाच्या काळात केवळ घोषणाबाजीलाच महत्त्व दिले. त्यामुळे लोकांचा भ्रमनिराश झाला आहे. तीन वर्षाच्या सरकारच्या भूलथापांविषयी जनतेमध्ये जनजागृती करण्यात येणार असल्याची माहिती काँग्रेसचे जिल्हाध्यक्ष आमदार चंद्रकांत रघुवंशी यांनी पत्रकार परिषदेत दिली.

केंद्र सरकारला तीन वर्ष पूर्ण झाले. या काळात सरकारचे यश-अपयश आणि लोकांचा भ्रमनिराश याविषयी जनजागृती करण्यासाठी काँग्रेसतर्फे राज्यासह देशभरात विशेष अभियान राबविण्यात येत आहे. त्याविषयी माहिती देण्यासाठी काँग्रेसचे जिल्हाध्यक्ष आमदार चंद्रकांत रघुवंशी यांनी सोमवारी पत्रकार परिषद घेतली. त्यांनी सांगितले, काम कमी आणि वल्गना जास्त अशी स्थिती मोदी सरकारची आहे. तीन वर्षात मोदी सरकारने केवळ काँग्रेस कार्यकाळात मंजूर आणि सुरू झालेल्या कामांचे उद्घाटन करण्यातच धन्यता मानली आहे. औद्योगिक विकास खुंटला आहे. बेरोजगारी कमी होण्याऐवजी वाढतच चालली आहे. परराष्ट्र धोरण, संरक्षण धोरण अपयशी ठरले आहे. सर्व पातळीवर मोदी सरकारला अपयश आलेले आहे. यावेळी उपनगराध्यक्ष राजेंद्र माळी, नगरसेवक रसिकलाल पेंढारकर उपस्थित होते.