वनविभागाच्या परवानगीनंतर मोलगी घाट सेक्शन रस्ता दुरुस्ती काम सुरू

लोकमत न्यूज नेटवर्कवाण्याविहिर : अक्कलकुवा ते मोलगी या रस्त्याची गेल्या पावसाळ्यात वाताहत झाली होती़ डाब ते आमलीबारी या अंतरात वाहून गेलेल्या पुलांसह ढापे पूर्ववत करण्यासाठी वनविभागाची परवानगी आवश्यक होती़ त्याला वनविभागाने मंजूरी दिल्यानंतर रस्ता काम सुरु झाले आहे़ रस्ता दुरुस्तीसाठी ‘लोकमत’ने सातत्याने पाठपुरावा केला होता़ त्यातून कामाला गती देण्यात आली आहे़सातपुड्याच्या दुर्गम भागातील मोलगी परिसरातील गावांना जोडणारा एकमेव रस्ता मोलगी ते अक्कलकुवा दरम्यान आहे़ देवगोई घाटातून जाणाऱ्या या मार्गाची गेल्या वर्षीच्या अतीवृष्टीमुळे मोठी हानी झाली होती़ आठपेक्षा अधिक पूल वाहून गेले होते़ जागोजागी दरड कोसळल्याने ढापे तुटून रस्ता उखडला होता़ यामुळे चार महिने मोलगी ते अक्कलकुवा अशी थेट वाहतूक बंद होती़ दुर्गम भागापर्यंत पोहोचण्याचा एकमेव मार्ग असल्याने रस्ता दुरुस्तीची मागणी होती़ सार्वजनिक बांधकाम विभागाने अ‍ॅन्यूटी या योजनेंतर्गत रस्ता दुरुस्तीसाठी ७५ कोटी रुपयांचा निधी मंजूर करुन ठेकेदाराची नियुक्ती केली होती़ परंतु डाब ते आमलीबारी दरम्यान जाणारा रस्ता वनक्षेत्रातील असल्याने वनविभागाची परवानगी आवश्यक होती़ वर्षभर परवानगीचा प्रस्ताव वनविभागाकडे पडून होता़ दरम्यान जागोजागी भराव केलेल्या जागांमधून वाहतूक सुरु होती़ यातून अपघात होण्याची भिती होती़ बांधकाम विभागाने यासाठी वनविभागाला पत्रव्यवहार करत पाठपुरावा सुरु ठेवल्याने त्यांनी गेल्या आठवड्यात मंजूरी दिली आहे़ पावसाळ्यात पक्के बांधकाम होवू शकत नसल्याने चार महिन्याची तरतूद म्हणून डाब ते आमलीबारी दरम्यान देवगोई घाटात दरड कोसळून रस्ता बंद होण्याची स्थिती निर्माण होवू नये यासाठी पुलांचा भराव व्यवस्थित करुन त्यावर पाईप टाकण्याचे तसेच पाण्याचा निचरा होण्यासाठी गटारी तयार केल्या जात आहेत़ जागोजागी कोसळलेली दरड वर्षभरानंतर बाजूला करण्यास वेग दिला आहे़ ही कामे पूर्ण होवून वाहतूक पावसाळ्यातही सुरळीत राहिल असे विभागाचे म्हणणे आहे़पावसाळा असल्याने पक्के काम करण्याऐवजी तरतूद म्हणून ढापा आणि पुलाची दुरुस्ती करत आहे़ पावसाळ्यानंतर पक्के काम केले जाईल अशी माहिती शाखा अभियंता रितेश पाडवी यांनी दिली आहे़