सहकारी बँका व पतसंस्थांच्या सभा होणार ऑनलाईन

आर्थिक वर्ष २०१९-२० या वर्षात कोरोना विषाणूच्या प्रादुर्भावामुळे सहकारी बँक, पतसंस्थांना वार्षिक सभा घेता आली नव्हती. गेल्यावर्षी मार्च ते सप्टेंबरपर्यंत कोरोनाने धुमाकूळ घातल्याने शासनाने संस्थांच्या वार्षिक सभा घेण्यावरही बंदी घातली होती. आता मात्र शासनाने कोरोनाचे नियम पाळून ३१ मार्चपर्यंत सभा घेण्यास परवानगी दिल्याने सहकारी पतसंस्थांनी शासनाने घालून दिलेल्या नियमानुसार सभांचे नियोजन केले आहे. काही संस्थांनी सभासदांना संस्थेत न बोलावता घरुनच झूम ॲपवरच ऑनलाईन सभेस उपस्थित रहाण्याचे आवाहन केले आहे. शहादा पीपल्स बँकेची ७१ वी वार्षिक सभा रविवारी दुपारी एक वाजता तर हरियाली को-ऑप क्रेडीट सोसायटीची १५ वी वार्षिक सभा रविवारीच सकाळी १० वाजता ऑनलाईन बोलावण्यात आली आहे. वार्षिक सभेसाठी प्रथमच अद्ययावत टेक्नाॅलाॅजीचा वापर होत असल्याने व यामुळे पतसंस्थांच्या खर्चात बरीच बचत होणार असल्याने सभासदांमध्ये समाधानाचे वातावरण आहे.