नंदुरबार : गुजरात राज्यातून आपल्या राज्यांकडे पायी निघालेल्या मजुरांना घरी पोहोचविण्यासाठी राज्य शासनाने एस. टी.च्या विशेष बस सोडल्या होत्या. या बसवरील चालक व त्यांना मदत करणारे वाहक यांना प्रत्येकी ३०० रूपये प्रोत्साहन भत्ता देण्याचे जाहीर करण्यात आले होते. परंतु, अद्यापही चालक-वाहकांना हा भत्ता मिळाला नसल्याची माहिती आहे.
नवापूर येथील सीमा तपासणी नाका व अक्कलकुवा येथून विशेष बस थेट छत्तीसगड, मध्यप्रदेश राज्याच्या सीमेपर्यंत चालविण्यात आल्या होत्या. यातून पायी जाणाऱ्या मजुरांना मोठा दिलासा मिळाला होता. परराज्याच्या सीमेपर्यंत धावणाऱ्या या बसेसच्या चालक व वाहकांना प्रत्येक फेरीनिहाय ३०० रूपये प्रोत्साहन भत्ता देण्याचे जाहीर करण्यात आले होते. परंतु, आतापर्यंत नंदुरबार, शहादा, अक्कलकुवा किंवा नवापूर आगारातील एकाही चालक किंवा वाहकाला हा भत्ता मिळालेला नसल्याची माहिती मिळत आहे. वरिष्ठांकडे संबंधित चालक व वाहकांच्या नावांच्या याद्या गेल्या आहेत.
नवापूर येथील सीमा तपासणी नाका तसेच अक्कलकुवा तालुका मार्गाने नंदुरबार जिल्ह्यातून आपल्या राज्याकडे जाणाऱ्या साधारण १८ हजार प्रवाशांसाठी नंदुरबार जिल्ह्यातील चारही आगारांतून बसेस सोडण्यात आल्या होत्या. गुजरात राज्यात अडकलेल्या चार हजार प्रवाशांनाही परत आणण्यात आले होते. यासाठी एकूण ६४१ बसफेऱ्या सोडण्यात आल्याची माहिती आहे. नंदुरबार आगारातील ३५०, नवापूर आगारातील २४०, शहादा ३०० तर अक्कलकुवा आगारातील सुमारे १५० चालक-वाहक या उपक्रमात सहभागी होते. त्यांच्याकडून पश्चिम बंगाल, ओरिसा, छत्तीसगढ व मध्यप्रदेश राज्यातील मजुरांना घराकडे पोहोचते करण्यात आले होते. या दरम्यान एकाही चालक किंवा वाहकाला कोरोनाची लागण झालेली नसल्याची माहिती मिळाली आहे.
चारही आगारांतील संघटनांकडून प्रयत्न
नंदुरबारसह शहादा, नवापूर व अक्कलकुवा आगारांतून या बसेस चालविण्यात आल्या होत्या. चालक व वाहक जोखीम पत्करत मजुरांना घेत मार्गक्रमण करत होते. यामुळे त्यांना कोरोना संसर्गाचा धोका होता. यातून त्यांना जाहीर झालेला ३०० रूपये प्रोत्साहन भत्ता अद्यापही मिळालेला नाही. आगाराच्या स्तरावर चालक व वाहकांच्या याद्या विभागीय कार्यालयाकडे पाठविण्यात आल्या आहेत. या याद्यांवर काम व्हावे, यासाठी विविध संघटनांचे पदाधिकारी पाठपुरावा करत असल्याची माहिती देण्यात आली. या याद्यांनुसार भत्ता देण्याची मागणी होत आहे.
नंदुरबार आगारातून कोरोना काळात परराज्यात जाणाऱ्या मजुरांसाठी सेवा देणाऱ्या चालक व वाहकांना प्रोत्साहन भत्ता येत्या काही दिवसात मिळणार आहे. विभागीय कार्यालयाकडे यासाठी प्रयत्न केले जात आहेत. एकही कर्मचारी या भत्त्यापासून वंचित राहणार नाही.
- मनोज पवार,
आगारप्रमुख, नंदुरबार.