जिल्ह्यात एकूण सात शासकीय तर २० खासगी कोविड केअर सेंटर्स व रुग्णालये आहेत. शासकीय रुग्णालयांमध्ये सध्या ४१० बेड्स आहेत. यातील १५२ सध्या रिकामे आहेत. तर ९ कोविड केअर सेंटरमध्ये ७३९ बेडची व्यवस्था करण्यात आली आहे. याठिकाणी २१० रुग्ण उपचार घेत असून ५२९ बेड हे रिकामे आहेत. या ठिकाणी उपचार करणारे वैद्यकीय अधिकारी रुग्णांच्या घटत्या संख्येमुळे निश्चिंत झाले असून त्यांच्याकडून पीपीई किट टाळले जात आहे. याला प्रमुख कारण सुरू असलेला उन्हाळाही असल्याचे सांगण्यात आले आहे. बहुतांश वैद्यकीय अधिकारी रुग्ण तपासणीसाठी जाताना, तोंडावर दोन मास्क, फेसशिल्ड, हँड ग्लोव्हज यांचा वापर करत असल्याचे दिसून आले आहे. पीपीई किट हे वजनाने जड आणि रुग्णांची सेवा करण्यात अडचणीचे ठरत असल्याने आरोग्य कर्मचारी त्याचा वापर टाळत असल्याचे जिल्हा रुग्णालयातील महिला रुग्णालयात दिसून आले.
पीपीई किट नसला तरीही याेग्य ती काळजी घेतल्यास कोरोनाची लागण होत नसल्याचे वैद्यकीय अधिकारी सांगत आहेत. केवळ आयसीयूमध्ये रुग्णसेवा करणारे वैद्यकीय अधिकारी व आरोग्य सेविका या पीपीई किटचा सध्या वापर करत असल्याचे सांगण्यात आले आहे. खासगी रुग्णालयात हीच स्थिती आहे.
उकाड्यामुळे पीपीई किट हे सोयीस्कर नाही. आणि लसीचे दोन्ही डोस झाल्याने कोणतीही अडचण नाही. यामुळे पीपीई कीटचा वापर कमी झाला आहे. सर्वच डाॅक्टर्स आता अधिक सजग झाले आहेत.
-वैद्यकीय अधिकारी, सिव्हील,
आम्हा महिला डाॅक्टर्ससाठी पीपीई किट अत्यंत जीवघेणे असेच आहे. यातून काही महिला वैद्यकीय अधिकाऱ्यांना गेल्या वर्षापासून पोटदुखीचे आजार जडले होते. म्हणून ते यंदा टाळले जातात.
-वैद्यकीय अधिकारी, सिव्हील,
कोरोना काळात सेवा देणारे वैद्यकीय अधिकारी हे तोंडावर मास्क व हाताला ग्लोव्हज लावून तपासणी करत होते. काही मोजक्या परिचारिका रुग्णालयात पीपीई किटचा वापर करत होते. काही नातेवाईक बाहेरून आणलेले पीपीई किट घालून रुग्णांना भेटण्यासाठी येत होते. पीपीई किटपेक्षा ग्लोव्हज आणि मास्क बरे असल्याचे वैद्यकीय अधिकारी व परिचारिका सांगत असतात.
-कोरोनामुक्त रुग्ण,
नंदुरबार,
कोविड केअर सेंटर्समध्ये सामान्य लक्षणे असलेले रुग्ण दाखल आहेत. यातून या ठिकाणी पीपीई किट वापराकडे दुर्लक्ष केले जाते. इतर सुरक्षेला महत्त्व आहे.
-आरोग्य कर्मचारी, नंदुरबार
पीपीई किट हा एक अवजड सुरक्षा उपाय आहे. जाेखमीच्या रुग्णांना तपासताना त्याचा वापर केल्यास काही हरकत नाही, पण सतत वापर अशक्य आहे.
-परिचारिका, कोविड सेंटर
कोविड वाॅर्डात दाखल होण्यापर्यंत खूप भीती होती. परंतू या भीतीतून सावरण्यास मदत झाली. या ठिकाणी पीपीई किट घातलेले कर्मचारी व अधिकारी दिसून आले नाहीत.
-कोरोनामुक्त रुग्ण, नंदुरबार