सीसीटीव्ही कॅमेरे सुरू करण्याची मागणी

निवेदनात म्हटले आहे की, शहादा शहरातील वाढती गुन्हेगारी लक्षात घेता तात्कालिन पोलिस निरीक्षकांनी शहरातील महत्वाच्या चौकांमध्ये १६ सी.सी.टी.व्ही. कॅमेरे स्थापित केले होते. मात्र अपवाद वगळता सर्वच यंत्रणा बंद आहे. सध्या कोरोनाने पुन्हा डोके वर काढले असल्याने जिल्हाधिकारी डॉ.राजेंद्र भारूड यांनी रात्रीची संचारबंदी तसेच प्रत्येक शनिवारी व रविवारी जनता कर्फ्यू जाहीर केला आहे. त्यातून शहरात चोरीच्या घटना वाढल्या आहेत. यामुळे नागरिक व व्यापारी भयभीत झाले आहेत. सी.सी.टी.व्ही. कॅमेरे सुरू राहिल्यास चोरांचा माग काढण्यास पोलीस प्रशासनाला मोठी मदत होणार आहे. तसेच शालेय विद्यार्थिनींना शाळेच्या आवाराबाहेर व बसस्थानकात छेडखानीच्या घटनांना सातत्याने सामोरे जावे लागत आहे. मात्र भीतीपोटी तक्रार करण्यास त्या धजावत नाहीत. या सर्वांचा विचार करता शहरातील सर्व सी.सी.टी.व्ही. कॅमेरे सुरू करणे त्यासोबत शहरातील सर्व शाळांच्या आवाराच्या बाहेर असलेल्या चौकात आणि बसस्थानक परिसरात किमान दोन सी.सी.टी.व्ही. कॅमेरे बसविल्यास गुन्हेगारी प्रवृत्तीच्या तरूणांवर वचक बसण्यासह मुलींना सुरक्षितता प्रदान होईल. या मागणीचा गांभीर्याने विचार करून तातडीने उपाययोजना कराव्यात, अशी अपेक्षा करण्यात आली आहे. निवेदनावर अखिल भारतीय ग्राहक पंचायतीच्या जिल्हाध्यक्षा वंदना तोरवणे, तालुकाध्यक्ष प्रा.डी.सी. पाटील, कार्याध्यक्ष डॉ.खलील शाह, सचिव प्रा.विजय येवले, खजिनदार किन्नरी सोनार आदींच्या स्वाक्षऱ्या आहेत.