तळोदा तालुक्यात २१ मार्च रोजी २५, २३ मार्च रोजी ३९, २४ मार्चला ४९, २६ मार्च रोजी ५१ जण पॉझिटिव्ह आले. त्यात रांझणी, खेडले, चिनोदा मोहिदा, बोरद या गावात कोरोना रुग्णांची संख्या अधिक झपाट्याने वाढत आहे. तळोदा तालुक्यातील रांझणी, खेडले, चिनोदा ही गावे कोरोनाची हॉटस्पॉट बनली आहेत. २२ मार्चपासून एकट्या खेडले गावात तब्बल ३७ तर रांझणीत ३५ रुग्ण आढळून आली आहेत. चिनोदा येथे सहा तर बोरदमध्ये तीन रुग्ण आढळून आले आहेत. २२ मार्च ते २६ मार्चदरम्यान तळोदा शहरात ७२ कोरोना रुग्ण आढळून आले आहेत. ग्रामीण भागातील व तळोदा शहरातील कोरोना रुग्ण संख्या पाहता हे आकडे धडकी भरवणारे आहेत. कोरोना रोखण्यासाठी तळोदा शहरासह ग्रामीण भागात विविध उपाययोजनांवर स्थानिक ग्रामपंचायत व आरोग्य प्रशासनाकडून भर देण्यात येत आहे. काही गावात संचारबंदी लागू करण्यात आली आहे. तालुक्यातील नागरिकांनी कोरोना प्रतिबंधात्मक उपाययोजनांचे पालन करून कोरोनाला हद्दपार करण्याची गरज आहे.
कोरोना बाधित रुग्णांचा त्वरित शोध घेण्यासाठी रॅपिड अँटीजन टेस्ट केली जात आहे. याअंतर्गत ३ हजार ४१७ जणांचे नमुने तपासणी करण्यात आले. रॅपिड टेस्टमुळे कोरोना बाधित रुग्ण शोधून लक्षणे नसलेल्या रुग्णांना शासन नियमावलीनुसार कोविड सेंटर किंवा गृहविलगीकरण करून तत्काळ उपचार सुरू करण्यात येत आहे. तालुक्यात मास्क वापरणे, सोशल डिस्टन्सिंग पाळणे, वारंवार हात धुणे व विनाकारण गर्दीच्या ठिकाणी न जाणे आदींबाबतीत आरोग्य विभाग व नगरपालिकेमार्फत जनजागृती करण्यात येत आहे.
ग्रामीण भागात वाढत जाणारी कोरोना रुग्ण संख्या ही नागरिकांसह प्रशासनासाठी चिंतेची बाब ठरली आहे. वाढत्या रुग्ण संख्येमुळे आरोग्य यंत्रणेवरील ताण वाढला आहे. मागील २५ दिवसांच्या कालावधीत कोरोना रुग्णांची संख्या २९६ च्यावर पोहोचली आहे. शहरासह ग्रामीण भागातील रुग्णांवर आरोग्य यंत्रणेची नजर असून रुग्णांना वैद्यकीय सुविधा उपलब्ध करून देण्यात येत आहेत.
ग्रामीण भागात कोरोनाचा वाढता संसर्ग रोखण्यासाठी आरोग्य विभागाकडून उपाययोजना करण्यात येत आहे. शहरासह ग्रामीण भागातील रुग्णावर आरोग्य यंत्रणेची नजर असून रुग्णांना वैद्यकीय सुविधा उपलब्ध करून देण्यात येत आहे. कोरोनाचा वाढता प्रादुर्भाव रोखण्यासाठी नागरिकांना प्रशासनाकडून दिल्या जाणाऱ्या सूचनांचे पालन करून सहकार्य करावे.
- डॉ. महेंद्र चव्हाण, तालुका वैद्यकीय अधिकारी, तळोदा