यावेळी मुख्यमंत्री ठाकरे यांनी ग्रामीण रुग्णालय परिसरात मांडण्यात आलेल्या रानभाज्यांची आणि सातपुड्यातील पारंपरिक पिकांची माहिती घेतली. त्यांनी रानभाज्या पिकविणाऱ्या आदिवासी बांधवांशी संवाद साधला आणि पारंपरिक वाणाचे संवर्धन केल्याबद्दल त्यांचे कौतुक केले. रानभाज्यांना बाजारपेठ मिळावी यासाठी प्रयत्न करण्यात येईल, असे त्यांनी सांगितले.
तोरणमाळ विद्युत उपकेंद्रासाठी सहकार्य करणार
मुख्यमंत्री ठाकरे यांनी धडगाव तालुक्यातील सुरवाणी येथील विद्युत उपकेंद्राच्या सुरू असलेल्या कामाची पाहणी केली. त्यांनी कामाबाबत समाधान व्यक्त केले आणि उर्वरित काम लवकर पूर्ण करण्याच्या सूचना दिल्या. काम पूर्ण करण्यासाठी शासन सर्वतोपरी सहकार्य करेल. दुर्गम भागातील विजेची समस्या दूर करण्यासाठी तोरणमाळ येथील विद्युत उपकेंद्रासाठी १६ कोटींचा प्रस्ताव पाठविल्यास त्यासाठी देखील सहकार्य करण्यात येईल असेही त्यांनी सांगितले.
हे उपकेंद्र पूर्णत्वास आल्यास अक्राणी, अक्कलकुवा व परिसरातील २०० गावे व साधारण ११ हजार ग्राहकांना याचा लाभ होणार आहे. या उपकेंद्रातून ३३ के.व्ही. दाबाने धडगाव, हातधुई, मोलगी, जमाना, काकरदा, पिंपळखुटा या गावाना वीजपुरवठा करण्यात येणार आहे. सद्यस्थितीत अक्राणी व अक्कलकुवा तालुक्यातील २२० गावांना शहादा उपकेंद्रातून वीजपुरवठा होत आहे. या उपकेंद्रामुळे ३३ के.व्ही. वाहिनीची लांबी कमी होणार असून, त्यामुळे या भागातील भविष्यात येणारी विजेची मागणी पूर्ण करण्यासाठी हे केंद्र महत्वपूर्ण ठरणार आहे, अशी माहिती यावेळी देण्यात आली.